Wa Jau Luka Hpa Shan Lum @ Tu Shan a Labau Kadun ( 5 JAN 2021 )

Wa Jau a Lashum Ga: “Ngai Hkrai Nga N-ngai Nrai, Wa gaw, Ngai Hte Rau Rai Nga Ai” (Yawhan 16:32)

Ma Kaji Prat

Wa Jau Luka Hpa Shang Lum @ Tu Shan gaw, Manmaw Jau Ginwang, Myale Sara Ninghtawn, Myale Mare hta 1987 ning, August shata (11) ya, Bat Hpang (2) ya shani hta shangai chyinghkai wa ai rai nga ai.

1987 ning, November shata (19) ya shani, Wa Jau Joseph Labang Tu a lata hta, Kashin Kamun Sacramentu hpe hkam la sai.

2003 ning, April shata praw (4) ya shani hta gaw, ya Madu kaw yup pyaw ban sa mat wa sai rai nga ai, Wa Saradaw Kaba Paul Zinghtung Grawng a Lata hta N-gun Shaja Sacramentu hpe hkamla sai rai nga ai.

Wa Jau gaw, Kawa Yawhan Hpa Gam hte Kanu Teresa Lahtaw Lu yan a kasha ni marai (9) hta na No (8), ngu na Shadang sha Ma Tu mahtang rai nga ai.

Wa Jau yen nau ni gaw,

1). Monica Hpa Kaw + Stephen Maji Lasha Hka

2). Hpa Brang Seng (n nga mat) + Lahpai Hka Tawm (n nga mat)

3). Teresa Hpa Bawk Mai + Myitung Luka

4). Pawlu Hpa Naw Ji + Veronica Hpawgan Lu Bu

5). Maria Hpa Roi Ji

6). Stephen Hpa La Seng

7). Hpa Htu Bu (n nga mat)

8). Luka Hpa Shan Lum (Wa Jau) hte

9). Htawma Hpa Tang Li ni rai nga ma ai.

Jawngma Prat

Wa Jau Luka Hpa Shan Lum @ Tu Shan gaw, Jawng Kaji kawn Tsang (4) hpaji hpe (1995-2001) ning du hkra Myale Mare, Lawu Tsang jawng hta sharin hkaja la lai wa sai. Tsang (5) hpaji hpe, (2001-2002) ning hta Kawng Dung Mare na Lapran Tsang Jawng hta hkaja la sai. Tsang (6) kawn Tsang (9) hpaji hpe gaw, (2002-2006) ning du hkra, Manmaw, Masat (2) Lahta Tsang jawng hta sharin awng la lu sai. Tsang (10) hpe gaw, 2006-2007) ning hpaji ladaw hta, Myitkyina, Aung Nan, Masat (3) lahta tsang jawng hta sharin hkaja la lai wa sai. Asuya Dakkasu hpe gaw, 2008-2011 ning du hkra, Myitkyina Dakkasu hta sharin la lai wa sai rai nga ai.

Jau Tai Jawngma Prat

Wa Jau Luka Hpa Shan Lum @ Tu Shan gaw,

• 2006-2007 ning hta, Myitkyina, San Columban Jau Tai Jawng Kaji (St. Columban’s Minor Seminary)
• 2007-2011 ning hta, Myitkyina, Shatarpu, San Patrick Jau Tai Dakkasu Tau Jawng (St. Patrick’s Intermediate Seminary)
• 2011-2013 ning hta, Manmalay, Pyin Oo Lwin, San Joseph Myit Sawn Hpaji Jawng (St. Joseph’s Major Seminary, Institute of Philosophy)
• 2013-2014 ning hta, Taunggyi, San Michael Wenyi Masa Hpaji Jawng (St. Michael’s Major Seminary, Institute of Spirituality)
• 2014-2018 ning hta, Yangon, San Joseph Jau Tai Dakkasu (St. Joseph’s Seminary, Institute of Theology) hta Karai Hpaji hte Jau ni chye ra ai hpaji hpe sharin hkam la lai wa sai rai nga ai.  

Brother hte Deacon Aya Hkamla Ai Lam

2011 ning, Mandalay, St. Thomas Jau Tai Jawng hta Entrance San Poi awng la nna, 2011 ning, April shata (7) ya shani, Nmawk, San Patrick Nawku Jawng hta Brother Shanggan hpe hkam la sai.

2019 ning, August shata (9) ya shani, Manmaw, San Patrick Nawku Htingnu hta, Manmaw Sasana Sagurem wa, Wa Saradaw Raymond Sumlut Gam a lata hta e, Deacon aya hpe hkam la lu sai rai nga ai. Deacon prat hta, 2019 ning, August shata kawn 2020 ning, August shata du hkra Maing Hkat Jau Ginwang hte 2020 ning August shata kawn Jau tai ai aten du hkra gaw, Laiza Jau Ginwang hta ap nawng magam gun lai wa sai rai nga ai.

Jau Tai Wa ai Lam

2020 ning, December shata (29) ya shani hta gaw, Panghkak Jau Ginwang, Immaculate Conception Nawku Jawng Wang hta, Manmaw Sasana Sagurem wa, Wa Saradaw Raymond Sumlut Gam a lata hta sha, Htani Htana Jau aya hpe hkam la lu sai rai nga ai.