Wa Jau Joseph Gam Hpang @ Lau Tin a Labau Kadun ( 6 JAN 2021 )

Wa Jau a Lashum Ga: “Nanhte Ngai Hpe Lata Myit Dai Nrai; Ngai She Nanhte Hpe Lata Made Ai” (Yawhan 15:16)

Ma Kaji Prat

Wa Jau Joseph Gam Hpang @ Lau Tin gaw, Manmaw Saradaw Ginwang, Nan Hlaing Mare hta shanu nga ai, Chyinghkai Kawa Patrick Lau Hkye hte Chyinghkai Kanu Maria Lahtaw Nang Tawng yank aw nna, 1988 ning, December shata (12) ya shani hta shangai chyinghkai wa ai rai nga ai.

Chyinghkai Kanu yan Kawa gaw, 1986 ning, May shata (15) ya shani, Wa Jau Francis Daw Tang (Ya Wa Saradaw Francis Daw Tang) kawn Hkungran Sacramentu hpe jaw ya sai. Chyinghkai Kawa gaw, Sam amyusha rai nna, Chyinghkai Kanu gaw, Jinghpaw amyusha rai nga ai.

Wa Jau gaw, Kahtawlik htung tara nga ai hte maren, 1989 ning, January shata (22) ya shani, Wa Jau Francis Daw Tang (Ya Wa Saradaw Francis Daw Tang) lata hta Kashin Kamun Sacramentu hpe hkam la lu sai rai nga ai.

Wa Jau yen nau ni gaw, marai (5) rai nna, shi gaw, No (2) ngu na, Ma Gam madaw rai nga ai.

Wa Jau yen nau ni gaw,

1). Madelena Pan Si @ Hkawn Mai + Luka Chyau Chyi Aung Shin

2). Wa Jau Joseph Gam Hpang @ Lau Tin

3). Teresa Lu Seng + Peter Yan Naing

4). Justina Roi Ja (2^nd Year Novitiate of SFX) hte

5). Columban Seng Yong ni rai nga ma ai.

Jawng Lung Prat

Wa Jau Joseph Gam Hpang @ Lau Tin gaw, 1994 ning kawn, 2000 ning du hkra lawu tsang jawng hpe Nan Hlaing Mare kaw lung lai wa sai.

2001 ning kawn 2006 ning du hkra lapran tsang jawng hpe Ma-U-Pin mare hta tsang (5) kawn tsang (9) du hkra lung lai wa sai.

Tsang (10) hpe, Myitkyina, Aung Nan, No (3) Lahta tsang jawng hta sharin awng la lu sai. Dakkasu jawng hpe, Myitkyina Dakkasu hta 2009-2011 ning du hkra, English Major hte ngut la lu sai rai nga ai.

Jau Tai Jawng Lung Prat

Wa Jau Joseph Gam Hpang @ Lau Tin gaw, 2007 ning, May shata (5) ya shani, Myitkyina, Aung Nan, San Columban Jau Tai Jawng Kaji de shang nna, tsang (10) jawng lung let, Jau tai hpaji hte makam masham lam ni hpe sharin hkaja la lai wa sai.

2008 ning kawn 2011 ning du hkra, Myitkyina, Shatapru Lawk kaw hpaw da ai, St. Patrick’s Intermediate Seminary (San Patrick Jau Tai Dakkasu Tau Jawng) hta Asuya Myitkyina Dakkasu jawng lung let, Entrance San Poi htai na matu English laika hpe sharin hkaja lai wa ai.

Entrance San Poi hpe, Mandalay, San Thomas Jau tai jawng hta htai awng la lu nna, 2012 ning, April shata (27) ya shani hta Brother Shanggan hpe hpun la lu sai.

2012 hte 2013 ning hta, myit sawn sumru hpaji hpe Pyin Oo Lwin, San Joseph Jau Tai Dakkasu (Institute of Philosophy) hta hkaja la lai wa sai.

2014 ning hta gaw, Taunggyi, San Michael Jau Tai Dakkasu hta Spiritual Year ngu ai, Wenyi hte myit ding li kai hpaji hpe sharin hkaja la lai wa sai.

Matut nna, Yangon, San Joseph Jau Tai Dakkasu (Institute of Theology) hta Karai hte seng ai hpaji hpe 2015 kawn 2019 ning du hkra sharin hkaja la lai wa sai.

2020 ning, August shata praw (4) ya shani hta gaw, Manmaw Sasana Sagurem wa, Wa Saradaw Raymond Sumlut Gam a lata hta Deacon aya hpe hkam la lu sai rai nga ai. Shi a Deacon Prat hte Mainghkat Jau Ginwang hta ap nawng magam gun lai wa sai.

Jau Tai Wa ai Lam

2020 ning, December shata (29) ya shani hta gaw, Panghkak Jau Ginwang, Immaculate Conception Nawku Jawng Wang hta, Manmaw Sasana Sagurem wa, Wa Saradaw Raymond Sumlut Gam a lata hta sha, Htani Htana Jau aya hpe hkam la lu sai rai nga ai.