Wa Jau John Lahtaw Zau Doi a Labau Kadun ( 5 JAN 2021 )

Wa Jau John Lahtaw Zau Doi gaw, Manje Mare, Pyin Oo Lwin Lawk hta 1991 ning, May shata (6) ya, Bat hpang (1) ya shani, Kawa Patrick Lahtaw Zau Lawn hte Kanu Rose Labya Bawk Ja yan kawn shangai chyinghkai wa ai rai nna, kahpu kanau ni marai (7) hta na, No (5) ngu na shadang sha rai nga ai.

Wa Jau a Kahpu Kanau ni gaw –

1). Veronica Lahtaw Nang Zin + Saing Win Myat Aung

2). Philip Lahtaw Hkun Seng + Maran Bawk Mai

3). Margret Lahtaw Nang Ra + Labang Nan Awng

4). Lahtaw Hkun Nawng

5). John Lahtaw Zau Doi (Wa Jau)

6). Rose Lahtaw Ja Doi Ra hte

7). Henry Lahtaw Zau Dim Awng ni rai nga ma ai.

Jawng Ma Prat hte Jau Tai Jawng Ma Prat

Wa Jau John Lahtaw Zau Doi gaw, 1996 ning, Jawng Katsi tsang kaw nna, 2002 ning, tsang mali du hkra gaw, Manje Mare, Jinghpaw Lawk na, Masat (3) Lawu Tsang jawng hta hpaji sharin hkaja la lai wa ai. 2003-2005 ning, Tsang (5) kawn Tsang (7) du hkra, Pyin Oo Lwin, Masat (1) lahta tsang jawng hta laika hpaji sharin hkaja la lai wa sai.

Jau tai jawng lung na matu hkyen lajang ai hta, Tsang (8) hpaji, 2005-2006 jawng lung ladaw hpe Myitkyina, San Columban Boarder hta nga let, Masat (2) Lahta Tsang jawng hta hkaja la lai wa sai.

Jau tai jawng kaji (Minor Seminary) de Wa Jau John Lahtaw Zau Doi a madi shadaw garum la ai hte 2006 ning, Tsang (9) shaning kawn sa nga hpang sai rai nga ai. 2006-2008 ning laman, Tsang (9) hte Tsang (10) hpe Myitkyina, Aung Nan, (St. Columban’s Minor Seminary) hta nga let, hkaja lai wa sai.

(2008-2013) ning du hkra, Myitkyina, Shatapru, Jau Tai Dakkasu Tau Jawng (St. Patrick’s Intermediate Seminary) hta nga let, Asuya Dakkasu hta e, Philosophy Hpaji Janmau gup la lu n na, 2013 ning hta, Brother Shanggan hpe mung hkam la lai wa sai.

(2013-2015) ning laman, Mandalay, Pyin Oo Lwin na, San Joseph Jau Tai Jawng Kaba, Myit Sawn Hpaji Jawng (Institute of Philosophy, Pyin Oo Lwin, Mandalay) hta myit sawn hpaji hpe (2) ning tup sharin hkaja la lai wa sai.

(2015-2016) ning hta gaw, Thaunggyi Mare kaba na, San Michael Jau Tai Jawng Kaba hta, (Spiritual Year) Wenyi masat hpaji hpe laning mi hkaja let, Karai Hpaji lam hta shakut lai wa sai.

(2016-2020) ning hta gaw, Yangon Mare Kaba, Mayangone na, San Joseph Tai Jau Jawng Kaba (Institute of Theology, Mayangone, Yangon) hta Karai Hpaji hte Jau ni chye ra ai hpaji ni hpe mali ning tup sharin hkam la lai wa sai rai nga ai.

Ya na zawn, Jau langai mi chye da ra ai, chye gying ai, Hpaji ni hpe sharin hkaja la ngut nna, 2020 ning, August shata praw (4) ya shani hta gaw, Mamnaw Sasana Sagurem wa, Wa Saradaw Raymond Sumlut Gam a lata hta, Deacon aya hpe hkam la nhtawm, N-Hkawng Pa de ap nawng magam gun lai wa sai rai nga ai.

2020 ning, December shata (29) ya shani hta, Panghkak Jau Ginwang, Immaculate Conception Nawku Jawng Wang hta, Mamnaw Sasana Sagurem wa, Wa Saradaw Raymond Sumlut Gam a lata hta sha, Htani Htana Jau aya hpe hkam la lu sai rai nga ai.