Verona Mare na San Pra ai Peter a Poi Nhtoi (April 29) 29 April 2023

Verona Mare na San Pra ai Peter a Poi Nhtoi (April 29)

San Pra ai Peter gaw, 1205 ning hta, Italy Mungdan, Verona Mare kaw shangai chyinghkai wai ai rai nga ai. Shi a kanu yan kawa gaw, Catharist Hpung shang ni rai ma ai. Catharist Hpung Shang ni gaw, mungkan ntsa kaw na mu lu ai jum lu ai arung arai ni hpe Karai Kasang hpan tawn ai n re, nga nna hkap la ma ai. Peter chyawm gaw, ma kaji prat ten kaw nna nan ndai zawn shut shai ai masa hpe aja awa ning hkap wu ai. Shi gaw, Kahtawlik Hpaji Jawng kaw lung ai hpang, Kahtawlik Dakkasu kaw hpaji bai matut sharin hkam la wu ai.

Dai majaw, “Karai Kasang gaw, Sumsing Lamu hte ginding aga nga yawng nga pra hpe hpan da ai.” nga nna shi hkap la let, shi a makam masham myit jasat hpe grau shagrin shanang la wu ai.

San Pra ai Peter gaw, Dominican Magam Gun Wuhpung de shang nna, San Pra ai Dominica hkum nan a lata kaw nna, Jau buhpun shang gang hpe hkap la lu sai. Shi gaw, tara hkaw ai hpaji ladat ni hpe hkrak sharin hka ja la nna, makam masham htak mat ai ni malawng maga nga shajang ai Lombardy ginwang na ni hpe makam masham lam hkaw sharin ya wu ai. 

Sarabyin Gregory (IX) gaw, shi hpe Italy Mungdan, dingdung maga na makam masham htak ai ni hpe jep sagawn na matu, lit shatsam ya ai. Dai majaw, mungkan ja sutgan hta pyaw len nga ai masha law law a n ju n dawng ai hpe hkam sha ra mat wu ai.

1252 ning, April shata (6) ya shani, shi a asak (46) ning hta shi gaw, tara a sakse tai sat kau ai hpe hkrum nu ai. Ndai gaw, Shi Misa hkungga nawng jau ai ten shagu hta, Chyoi Pra Gawm sharawt ai shaloi, “Madu e, Nye a matu, si hkam ai Na a matu, ngai si hkam lu na chyeju jaw ya rit.” Nga nna shani shagu shi hpyi ai akyu hpyi gag aw dik wa sai. Shi gaw, Kasa ni a Makam Masham Ga akyu hpyi gat sun let, nsa hti Madu kaw yup pyaw ban sa mat wa sai rai nga ai.

Shi n nga mat ai hpang, 1253 ning, March shata (9) ya shani gaw, dai aten na Wa Sarabyin Innocent (IV) kawn, shi hpe San Pra ai Masha dang dat nna, shi a Poi Nhtoi hpe mung, April shata (29) ya shani ngu masat shagrau dat ya sai rai nga ai.

Daini Nawku Hpung gaw, Verona Mare na San Pra ai Peter a Poi hpe galaw nga ga ai aten hta, anhte prat hta mung, lam dam taw nga ai tinang a makau grup yin na hpunau ni hpe lam kaja de woi sa ya lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)