Utrecht Mare na, San Pra ai Frederick a Poi Nhtoi (July 18) 18 July 2023

Utrecht Mare na, San Pra ai Frederick a Poi Nhtoi (July 18)

San Pra ai Frederick gaw, myit kaba ai kun dinghku kaw na rai nga ai. Shi gaw, hpaji hpe Netherlands Mungdan, Utrecht Nawku Jawng na Jau ni kaw sa sharin la wu ai. Saradaw Ricfried a lata kaw na Jau tai Sacramentu hkam la lu nna, Hkristan ni a hkan sa tara sharin ya ai lit magam shatsam ya ai hkrum sai. Dai hpang Wa Jau Frederick gaw, A.D (820) ning hta, Utrecht mare na, Saradaw lit shatsam ai hpe hkrum sai rai nga ai.

Dai aten hta, Saradaw Frederick lit ang ai Netherlands mung na ginwang kaw gaw, Nat jaw ai ni grai naw nga ai sha n-ga, kam mara rai nga ai, sai grai ni hkat ai ni shada da mayaw htinggaw de nga sha ai, mazut la ma ai hte mang hkang ni jahkring hkring byin ai shara mung rai nga ai. Raitimung, Saradaw Frederick gaw, n sim n sa akyu hpyi, lusha gam let shadum jahprang ya ai majaw, myit malai lu wa ma nna, Karai Kasang hpang de bai du wa ai ni grai law wa ma ai. N hkru n kaja ai lai len ni shawa de n du na matu shakut sharai ya ding yang rai nga ai majaw, Saradaw Frederick gaw, Hkawhkam ni a n ju n dawng ai hkrum sai; grau nna, akyang lai len n kaja ai lam ni law law gaw, Hkawhkam wa a lahkawng ngu na Num a majaw re ngu, tsun shadum ai majaw, shi hpe grau nna hkawhkam wa grai n ju mat wu ai.

Dai majaw, A.D (838) ning, July shata (18) ya jahpawt Misa Hkungga Nawng Jau ngut ai hpang, Nawku Tawn kaw nna, Saradaw yu wa ai shaloi, masha sat ai marai lahkawng shi hpe nhkyi hte galun sat kau ma ai.

Saradaw gaw, shi a n-gup kaw nna, “Sak hkrung ai ni a buga kaw, ngai gaw Karai Kasang hpe shakawn shagrau let nga nga na nngai.” (Shakawn 116) nga nna tsun ngut ai hpang nsa hti mat wa sai rai nga ai.

Saradaw Frederick n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, July shata (18) ya shani ngu masat shagrau dat ya sai rai nga ai.

Daini Nawku Hpung gaw, Utrecht Mare na, San Pra ai Frederick a Poi Nhtoi hpe galaw nga ai aten hta, anhte Hpung Masha ni mung, anhte a sak hkrung nga ai aten ladaw hta, Madu Yesu matsun sharin da ya ai, Hkristan asak aprat hte hkrak tinang a makau grup yin hkan na, Hkrisatan n rai shi ai ni a lapran hta kasi kamang kaja tai lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)