Tsawra matsan dum lama ai chyeju daw 2 (Indulgencence ) 20 August, 2019

Indulgencence ( Tsawra matsan dum lama ai chyeju )   daw 2

          Nu wa hpu nau ni, Lai sai lamang hta, ndai Indulgencence a chyeju kumhpa hte seng nna, kau chyen hpe na la lu saga ai rai nga ai. Ndai chyeju kumhpa hpe ngawn nsawn majoi jai lang nhtawm me, kam mara rai, mahtai tam nna, tinang a matu chyu, akyu jashawn jai lang jang mung, hkrum tsup ai chyeju ni hkam la lu na nre lam, (1305 – 1314 ) ning laman na hpung ting a ningbaw rai nga ai Wa sarabyin Claymen (5) kawn ndau shabra sai rai nga ai. Bai nna, (1418 ) ning hta galaw lai wa sai, Council of Constance ngu ai zuphpawng kaba hta, ndai Indulgencence ngu ai chyeju kumhpa hpe majoi hkrum mara lachyum byan la ai, lachyum n jaw ai hku hkaw tsun, sharin shaga ai lam ni hpe, Nawku hpung a tara shang nre ai, ngu nna, Wa sarabyin Benedit (14 ) kawn (1740 – 1758 ) ning du hkra, aja awa, ninghkap, pat shingdang da ai rai nga ai. Tinang hkrai kam ai hku lachyum htai nna, Indulgencence chyeju hpe hkam la ai wa gaw, awng dang ai, hpring tsup ai chyeju nre ai sha n ga, daizawn galaw ai lam hpe aja awa, pat shingdang da sai lam nawku hpung a labau hta adan sha hpaw tsun da ai hpe chye lu ai.

          Nu wa ni, Nawku hpung kawn nna, Masa jaw ai hku tsun ga nga jang gaw, Mara raw  Sakramentu rai nga ai, tinang a shut mara ni hpe, kaja wa myit yawn myit malai let, Jau kaw mara sa raw rai, Jau jaw ai mara dan hpe hkam la nhtawm me, hpang jahtum Jau a shaman chyeju hpe hkam la ra ai rai nga ai. Reng jang she, Mara raw dat hkrum ai hpang na, ari dan hka hpe shaprai ya ai ahkaw ahkang, Indulgencence ngu ai chyeju hpe hkam la lu na rai nga ai.  Shingrai, ndai Indulgencence chyeju kumhpa hpe, lahta de na la lu sai, hkan sa ra ai tara lam ni hpe hkap shatup let, akyu hkam la mai nga mali ai re. Bai nna, Nawku hpung kawn masat ai lak lai ai poi nhtoi shani hte masat tawn ai, nawku hting nu, shara ginra ni hkan sa du let, akyu hpyi ai a marang e, ndai chyeju kumhpa ni hpe mai hkam la ai lam nawku hpung kawn masat da sai rai nga ai. Nawku hpung kawn sadi jaw da ai lam mung naw nga nga mali ai re. Dai gaw, ndai Indulgencence chyeju kumhpa gaw, mara a matu, myit yawn myit malai ai kumla hku nna, lu sha gam let, kyu hpyi ai, shada tsawra matsan dum ai magam bungli ni hpe shakut galaw ai hte mung nbung nga mali ai. Dai madang hta lak lai ai hku nna, Madu Yesu hte San Pra ai ni a Chyeju a marang e, nawku hpung kawn jaw da ai ahkaw ahkang rai nga ai, myit yawn myit malai kaba lu sai mara kap ai wa hpe kashin shatsai kau ya ai chyeju nan mung rai nga ai.

          Shingrai, Ndai Indulgencence chyeju gaw, Nawku hpung hte Karai kasang a tara je yang ai lam hpe hkam la na matu ngu ai, hkawng yen akyu rawng ai rai nga ai. Lachyum gaw, Nawku hpung hta hkan sa ra ai tara lam hpe tawt lai ai lam ni, Shut shai lai mat sai mara ni a matu, karai kasang a tara ai hku je yang daw dan ai hpe hkam la ai lam ni, raw dat hkyem sa lu ai lam rai nga ai. Ndai zawn nawku hpung kawn sharin shaga ai lam gaw, karai kasang tawn da ya sai daw dan lam ni shing nrai, mara lu ai wa hku nna, naw ngam nga ai mara dan ni hpe, nawku hpung kawn nna, malap mali ai lam n nga ai sha, teng tup raw dat ya sai lam mung rai nga ai. Ndai lam hte seng nna, San Pra ai Thomas Aqunus tsun ai hta, Indulgencence chyeju hpe hkam la lu ai ni gaw, mara dan kaw nna shalawt kau ya ai nre sha,  mara dan kawn, raw dat hkyem sa jaw ya ai, ngu ai lam hpe sharin dup bang ya sai lam, Supplement 25.1 ad2um  hta mu mada lu nga ai. Dai majaw, Kanu nawku hpung hku nna, jet ai Kanu langai hku nna, mara lu ai tinang a sai daw sai chyen kasha hpe majoi gabai da ai hku nre sha, galoi mung, bau sin makawp maga ai lam rai nga ai. Lama shut kataw wa ai ten hta mung, dai mara kata hta, len nga ai lam n nga ai sha,, bai rawt myit malai lu na matu, garum ya nga ding yang rai nga ai.

          Shingrai, Nu wa hpu nau ni, ndai Indulgencence ngu ai, tsawra matsan dum lama ai chyeju hpe jaw na matu, ahkaw ahkang jaw lu ai ni gaw, Nawku hpung a ningbaw rai nga ai, Wa sarabyin shing nrai, Sasana a sagurem wa Wa saradaw ni rai nga ai. Daizawn ahkaw ahkang hpe jaw ai gaw, shi a ahkaw ahkang aya hpe majoi jai lang ai hku n rai nga mali ai. Karai kasang a malai, mara lu ai wa a, mara dan ni hpe hpyi nem tawng ban ya nga ai lam rai nga ai. Dai majaw, ndai Indulgencence chyeju hpe ndau shabra dat ai wa sarabyin, shing nrai, wa saradaw ni hku nna, Karai kasang kaw nna lu la ai tara shang ahkaw ahkang lapran, Wenyi n gun atsam chyeju ni hpe htinglu htinglai ya ai lam rai nga ai. Dai majaw mung, karai kasang a tara rap ra ai lam hpe shaprai kau nmai ai sha n ga, karai kasang ra sharawng ai lam hpe  hpring tup jaw lu na atsam hpe mung, ngam da nmai ai lam rai nga ai. Shingrai, kanu nawku hpung kawn nna, galoi aten, gara hku, ganing di na ngu ai hpe, atsawm sha sawn ding lik, maram yu nna she, daw dan shagrin ra ai lam rai nga ai. Shing nga tsun nna, grai gyip gyeng ai zawn rai nga ai. Tsun mayu ai gaw, Chyoi pra ai Catholic nawku hpung gaw, Madu Yesu hte karai kasang a lapran, npawt nhpang de let, hkye hkrang la ai magam hta yawng shang lawm lu na matu, lak lai ai chyeju kumhpa ni hpe hkam la lu hkra, shading sharai ya ai lam rai nga ai. Shingrai, ndai Indulgencence chyeju kumhpa hpe, mungkan mungdan ting hta, hkam la mai ai rai nga ai. Raitim, shara masat ai lam gaw, dai chyeju jaw ai a yaw shada lam hta hkan nna, shai ai lam gaw nga na re, ngu gam garan ya let, ngam nga ai daw hpe du na lamang hta bai gam garan ya na n ngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.