Tolentine mare na San Pra ai Nicholas (September 10) 10 Sept 2023

Tolentine mare na San Pra ai Nicholas (September 10)

San Pra ai Jau Nicholas gaw, Italy mung mungdan, St. Angelo shara hta lai wa sai 1245 ning hta shangai chyinghkai wa ai rai nga  ai. Nicholas gaw, Ma kaji ten kaw nna san seng san pra ai myit jasat ni a majaw, Saradaw kaba a "Hkye La Madu Nawku Jawng" the Church of Pur Savior, kaw na lit gun Jau ni hte rau lit shatsam da hkrum ai. Shi gaw, Sarabyin uphkang ai ginwang na mare kaji rai nga ai, Toletime kaw na Augustinian Tawra Jau Wughpung de shang ai. Dai mare kaw shi a sakhkrung ten malawng amu gunhpai ai majaw Tolentine ngu ai mying lu la ai rai nga ai.

San Pra ai Jau Nicholas gaw, Shi a sumnung shingdi ai myit hte shagrit shanem ai sat lawat ni a majaw, shanhte wuhpung hte seng ai shara shagu de shangun hkrum wu ai. Cingole Tawra Jau Jawng kaw Osimo mare na, Saradaw gaw Nicholas hpe Jau shatai ya sai. Jau Nicholas gaw, Tara hkaw ai bungli hte Jau ni a kasa amu hpe shakut shaja nna galaw gun hpai ai. Dai hta n-ga, Wenyi hkye la ai amu hpe shi grai sharawng shara, atsam dat nna gun hpai ai.

Jau Nicholas gaw, amu galaw shaja ai hte akyu hpyi ai myit jasat ni a majaw, shaman chyeju law law hkam la lu ai. Machyi makaw amyu shagu hkrum timung, shi a law la ai bungli ni hpe n hprai ai sha galaw ding yang rai nga ai. San Pra ai Nicholas hpe "Sanghpaw amu gun ni a makawp maga wa" ngu nna hkungga jaw shagrau nga ai re.

San Pra ai Jau Nicholas gaw, Shi a Asak 60 ning, 1305 ning September shata (10) ya shani hta, Madu kaw yup pyaw ban sa mat wa sai rai nga ai.

Shi n nga mat ai hpang, 1446 ning, June shata (5) ya shani hta, dai aten na, Wa Sarabyin Eugene (4) kaw nna, Shi hpe San Pra ai Masha dang dat let, Shi a Poi Nhtoi hpe mung, September shata (10) ya shani ngu masat shagrau dat ya sai rai nga ai.

Daini, Nawku Hpung gaw, San Pra ai Wa Jau Nicholas a poi nhtoi hpe galaw nga ai hte maren, anhte hpung masha ni mung, Wa Jau Nicholas zawn, anhte sak prat hkrun lam tup hta sumnung shingdi, shagrit shanem let, makam masham lam hta hkan sa shakut hkawm sa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)