Tolentine mare na San Pra ai Nicholas (September 10)

San Pra ai Jau Nicholas gaw, Italy mung mungdan, St. Angelo shara kaw 1245 ning hta shangai chyinghkai wa ai rai nga  ai. Ma kaji ten kaw nna san seng san pra ai myit jasat ni a majaw, Saradaw kaba a "Hkye La Madu Nawku Jawng" the Church of Pur Savior, kaw na lit gun Jau ni hte rau lit shatsam da hkrum ai. Sarabyin uphkang ai ginwang na mare kaji rai nga ai, Toletime kaw na Augustinian Tawra Jau wughpung de shi shang ai. Dai mare kaw shi a sakhkrung ten malawng amu gunhpai ai majaw Tolentine ngu ai mying lu la ai rai nga ai.

San Pra ai Jau Nicholas gaw, Shi a sumnung shingdi ai myit hte shagrit shanem ai sat lawat ni a majaw, shanhte wuhpung hte seng ai shara shagu de shangun hkrum wu ai. Cingole Tawra Jau Jawng kaw Osimo mare na, Saradaw gaw Nicholas hpe Jau shatai ya sai. Tara hkaw ai bungli hte Jau ni a kasa amu hpe shakut shaja nna shi galaw gunghpai ai. Wenyi hkye la ai amu hpe shi grai sharawng shara, atsam dat nna gun hpai ai.

Jau Nicholas gaw, amu galaw shaja ai hte akyu hpyi ai myit jasat ni a majaw, shaman chyeju law law hkam la lu ai. Machyi makaw amyu shagu hkrum timung, shi a law la ai bungli ni hpe n hprai ai sha galaw ding yang rai nga ai. San Pra ai Nicholas hpe "Sanghpaw amu gun ni a makawp maga wa" ngu nna hkungga jaw shagrau nga ai re.

San Pra ai Jau Nicholas gaw, Shi a Asak 60 ning, 1305 ning September shata (10) ya shani hta, Madu kaw yup pyaw ban sa mat wa sai rai nga ai.

Shi n nga mat ai hpang, 1446 ning, June shata (5) ya shani hta, dai aten na, Wa Sarabyin Eugene (IV) kaw nna, Shi hpe San Pra ai masha dang dat let, shi a Poi Nhtoi hpe mung, September shata (10) ya shani ngu masat shagrau dat ya sai rai nga ai.

Daini, San Pra ai Wa Jau Nicholas a poi nhtoi hpe Nawku hpung kawn galaw nga ai hte maren, anhte hpung masha ni mung, sumnung shingdi, shagrit shanem let, makam masham lam hta shakut lu na chyeju jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)