Thyatira Mare na San Pra ai Lydia a Poi Nhtoi (August 3)

Roma Asuya Uphkang ai Lydia ginwang, Thyatira mare na, amyu shayi Lydia hpe Kasa Pawlu grai kam shamyet kau ai lam, Kasa Luka ka da ai (Kasa 16:11-15) kaw mu hti lu nga ga ai re.

Kasa Pawlu, Filipi mare de du ai, A.D (55) ning hta, Lydia gaw, bu hpun palawng kaw chya shatsawm ai nam-ya tsi du tai num rai nga ai. Shi gaw, Karai Kasang hpe nawku ai wa gaw re raitimung, Kasa Pawlu a matsun maroi ga ni hpe na la lu ai hpang she, Kashin Kamun hkam la ai. Lydia a htinggaw gaw, Uropa dan na shawng nnan Kashin Kamun Hkam la ai rai ma ai. Nawku Hpung de shang wa ai hpang Kasa Pawlu, Luka hte Silas ni Filipi mare kaw Sasana magam gun nga ai ten tup, Lydia garum jaw let hkap hkalum tawn ai.

San Pra ai Lydia gaw, Karai Kasang hte Shi a magam gun ni hpe garum madi shadaw ya ai myit jasat rawng ai ni a kasi tai wa sai.

Shi hpe e, Nawku Hpung gaw, San Pra ai Masha dang da nna, shaning shagu August shata praw (3) ya shani hta ding yang shagrau ya taw ai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)