Sts. Gundleus and Gwladys (March 29) 29 March 2023

Sts. Gundleus and Gwladys (March 29)

San Pra ai Gundleus hte Gwladys yan gaw, kam ai hku nna ngai lai wa nhtawm, teng ai myit majing hte myit malai wa let, tara shakut let myit sim sa rai sak hkrung hkawmsa lu na matu, ya prat na ni hpe kasi kamang tai ya ai yan rai nga ma ai.

Gundleus gaw, Wales mungdan na ningbaw kaba langai mi rai nga ai. Shi gaw, Brychan hkawhkam a kasha Gwladys hpe nrum ntau jan shatai na sa hpyi yang hkawhkam Brychan n hkraw ai majaw, Gwladys hpe lagu rim la wu ai. Shan a prat gaw, kam ai hku nga lai wa nna, kashun sha ai Damya amu galaw sha ai prat rai nga ai.

Raitimung, shanhte a kasha San Pra ai Cadoc gaw, shan a shut hpyit mara kata hta sak hkrung hkawmsa nga ai, mungkan a pyaw lam hta myit maju jung nga ai myit jasat ni hpe rap di kau nhtawm, makam masham hta manoi manat sat hkrung nga na matu shadum ya, shading sharai ya sai. Dai majaw, shan lahkawng mung, mungkan pyaww lam hte n hkru n kaja ai baw magup sumhpa yawng hpe tawn kau da nhtawm, tara shadik let sak hkrung nga na daw dan manu ai. Shan lahkawng kaga ga tawra zawn nga nna, si ai aten du hkra tara shadik let nga mat ma ai.

San Pra ai Gundleus hte Gwladys yan a galai shai wa ai myit jasat hpe shakawn shagrau ya nna, shan a tara shadik shakut shaja nna sak hkrung nga lai wa ai Nawku Jawng law law hta shan hpe myit dum shagrau ai lam ni galaw ya nga ai. Ndai San Pra ai yan gaw, ya prat na masha ni a matu, akyu hpyi shaja let makam masham hta myit jung nna, agung alau ni hpe koi yen kau, mungkan a pyaw lam ni hpe shingdu gayin kau da lu na matu, kasi kaja madun ya ai, San Pra ai yan mung rai nga ai.

Shan lahkawng  n nga mat wa ai hpang, Nawku Hpung gaw, San Pra ai Masha dang dat let, Shan a Poi Nhtoi hpe mung, March shata (29) ya shani masat shagrau dat sai rai nga ai.

Daini Nawku Hpung gaw, San Pra ai Gundleus hte Gwladys yan a Poi Nhtoi hpe, galaw nga ga ai aten, anhte a prat hta mung, kaning re ai prat, kaning rai shut hpyit mara ni hpe galaw shut kau lai wa ai raitim, myit yawn myit malai lu let, Karai Kasang Wa myit ra sharawng ai hku nna, sak hkrung hkawm sa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)