St.John Boste, George Swallowell hte John Ingram (July 24) 24 July 2020

St.John Boste, George Swallowell hte John Ingram (July 24)

1594 ning hta makam masham a majaw, sat kau hkrum ai share shagan marai (3) hpe Durham Martys ni ngu nna shamying ai. Shanhte gaw, makam masham a majaw, England mungdan, Durham mare makau kaw masha myit nrawng ai masha ni kawn zingri shamyit ai kaw sat kau hkrum lai wa ma ai. San Pra ai John Boste gaw, Oxord mare na Hkawhkam Jan a Dakkasu, Queen´s College kaw 1544 ning hta hpaji sharin la ai. Shi a asak (22) ning hta Dakkasu kaw atsam rawng ning tawn ai arawng aya ni yawng hpe shingdu tawn kau da let, Kahtawlik Nawku Hpung de gale shang wa nu ai. 1580 ning hta shi Jau tai wa nna England mungdan kaw sasana magam gun ai. England mungdan dingdung maga na ningbaw kaba rai nga ai Huntington gaw, Jau John Boste hpe kaga Jau ni hta grau nna mayam shatai na matu rim la kau na gyam nga ai. Shi hpe London Tower (snr) London Langchyi de masu woi wa nhtawm shi a manang ni a lam tsun dan na matu lagyim san let, zingri shatsang ma ai. Shi hpe Durham de bai dat dat nhtawm lagyim jep shatsang timung, shi tsep kawp n tsun dan ai. Protestant hpung up kaw nna, Kahtawlik Nawku Hpung de gale shang wa ai George Swallowell hpe mung, Jau John Boste hte rau jep shatsang ma ai. George Swallowell gaw tara rung kaw, shi a Kahtawlik Makam Masham hpe hkap la ai lam asan sha tsun ai shaloi Jau John Boste gaw shi hpe "Shawa mara raw hkrang" hte shaman ya ai. Dai hpang nhtoi kade nna yang, George hpe Darlington mare kaw sat shamyit kau hkrum nu ai. Jau Boste hpe gaw, 1594 ning, July shata (24) ya shani tara jahkrat nna, Durham mare shinggan Dryburm shara kaw jeyang sat kau ma ai. Durham mare kaw sat kau hkrum ai ni hta Jau John Ingram mung lawm ai. Jau Ingram gaw, Nawku Hpung de gale shang wa ai hpang Oxford mare na New College, Rheims hte Roma mare na Dakkasu ni hta laika hpaji sharin lai wa sai. 1589 ning hta Jau tai wa nna, 1592 ning hta Scotland de sasana magam gun na matu lit shatsam hkrum sai. 1593 ning hta, Jau Ingram hpe rim la nna London mare de shalai dat ma ai. Shi hpe laja lana zingri shatsang ma ai rai timung shi a manang ni hpe shi sadi dung ding yang rai nga ai. Jau John Boste sat kau hkrum ai hpang lahkawng ya na ai shaloi Wa Jau Ingram hpe jen noi dat, garawt hkawm dat, gyit hkang zingri shatsang rai sat kau ma ai. Dai majaw, Nawku hpung kawn, July shata (24) ya shani hta Makam Masham a majaw sat kau hkrum lai wa ai San Pra ai John Boste, George Swallowell hte John Ingram ni a poi nhtoi hpe galaw ya ai rai nga ai.

By; Sister Rose Angeline Maran Nang Doi (SFX)

RVA-Kachin Service

(Myitkyina)