St. Joseph The Worker (May 1) 01 May 2023

online image

St. Joseph The Worker (May 1)

San Pra ai Joseph gaw, bungli Galaw Masha ni hte Nawku Hpung ting a laksan kam shamyet nga ai San Pra ai Masha rai nga ai. Shi a bungli madung gaw, Laksma Bungli rai nga ai. (Mahte 13:55)

Shi gaw, Maria hte Kasha Yesu hte rau Nazaret Mare kaw nga nna, Ma Yesu hpe Laksama amu sharin ya ai. Ma Yesu mung, San Pra ai Joseph madun ai kasi ni hpe mu lu nna, masham hkum gu, shani shagu galaw ra nga ai amu bungli ni yawng gaw, sari rawng ai hkrai re ai lam, bai nna lagawn lamawn re ai lam gaw, agung alau shalaw ai hpan rai nga ai lam hpe mung, ma kaji ten kaw nna nan atsawm sha chye na mat wa ai. “Lagawn lamawn ai lam gaw, n kaja ai baw hpan ni hpe sharin ya nga ai.” nga nna (Sirak a Laika 33: 28) kaw shadum da nga ai re.

1955 Ning, May Shata Praw (1) ya shani, Wa Sarabyin Pius (XII) gaw, Italy Mungdan tinang na Kahtawlik Bungli Galaw ai Masha Wuhpung ni hpe mungga htawn ai hta, “May shata praw (1) ya shani gaw, amu galaw sha ai masha San Pra ai Joseph a Poi Nhtoi rai nga ai. Daini gaw, Nazaret mare kaw na shagrit shanem myit, shakut shaja myit hte bungli galaw shaja let sak hkrung nga lai wa ai San Pra ai Joseph hpe bungli galaw let sak hkrung nga shajang ai shaing gyim masha yawng mayawng hpe tau hkrau nna makawp maga, garum ya ai wa ngu nna masha nga manga hta alak mi nan shagrau hkungga ai Poi Nhtoi” mung rai nga ai.

Bai nna, daini na nhtoi hpe 1889 ning kaw nna, “Bungli Galaw Masha ni a Nhtoi” ngu nna mungkan ting hta masat galaw nga ga ai re. Daini e, anhte hpe amu bungli shagu gaw, sari rawng ai hkrai rai nga ai lam, masha shagu gaw, bungli galaw nan galaw ra ai lam hte anhte galaw ai lata bungli a sari hpe shadum ya ai nhtoi mung rai nga ai. “(2Htesa 3: 10) hta  A mu n galaw ai wa gaw shat mung n sha u ga nga nna ka shadum da nga ai,” nga nna kahtap shadum ya sai rai nga ai.

Shing gyim masha shagu gaw, tinang a matu, tinang a kun dinghku a matu amu galaw ra nga ga ai. Amu galaw ai ngu ai gaw, Karai Kasang shachyen galaw ai bungli ni hpe garum jaw ya lawm ai rai nga ai. Anhte galaw ai amu bungli ni san seng san pra ai byin tai na matu hte shaman chyeju hkam la lu na matu, Karai Kasang hpe ap jaw ya ra ga ai. Ndai lam hte seng nna, San Pra ai Benedict gaw, “Ora et Labora (Shing n rai) Akyu Hpyi ai hte Bungli Galaw u.” nga nna matsun da nga ai re.

Daini, San Pra ai Joseph a Poi Nhtoi hpe galaw nga ga ai hte Maren, daini kaw nna gaw, Nu Maria Hpang de Rosary hti hpang ai Nhtoi mung rai nga ai. Dai majaw, anhte hpung masha ni yawng, byin mai ai daram shani shagu Rosary Hti Akyu Hpyi lu hkra mung shakut sa wa ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

1 + 0 =