Vatican kaw na “National Gallery of Ancient Art, Rome” hta hkikhkam tsawm htap dik ai sumla langai ngai gaw “The Guardian Angel” “Sin Ai Lamu Kasa Ni” a sumla rai nga ai. Dai sumla hpe sumla soi sara kaba Pietro Da Cortona (1596-1669) soi da ai re chye lu ai. 1666 shaning hta soi shangut da lu ai rai nga ai.

Shawng na Hkristan masha ni Lamu Kasa ni yawng a poi hpe Lamu Kasa san Michael a poi hta arau sha galaw ma ai. “Sin Ai Lamu Kasa poi hpe Spain mungdan, Valencia hta, 1411 shaning kaw nna laksan nhtoi hta galaw hpang wa ma ai. “Sin ai lamu kasa” hte seng nna masat shagring da ai Dogma sharin shaga lam gaw n nga shi ai rai tim, Council of Trent (1545-1563) hta masha shagu hta sin ai lamu kasa nga ai ngu sharin shaga ai lam galaw hpang ma ai.

Nawku hpung labau hta tsaban 16 hpang daw de, Jau, mama, brother ni tsun ai akyu hpyi ga laika buk hpe jahtuk shatsawm ai hta buga ginra ni hta galaw ma ai poi ni hpe shalawm wa ma ai rai nna, 1608 shaning hta nawku hpung shata hti laika hta Lamu Kasa San Michael, Lamu Kasa San Gabriel hte Lamu Kasa San Raphae l ni a hpang na nhtoi hpe sha-ang nna bang da ma ai. 1670 shaning hta Wa Sarabyin Clement X kaw nna Sin ai lamu kasa poi nthoi hpe masat shagrin da ya ai.

Nawku hpung hta yin la ai lam gaw rai nga ai. Sin ai lamu kasa hte seng nna San Jerome hte San Basil yan shadan shalen da ma ai hpe lakap nna hkap la ai rai nga ai. San Augustine, San Ambrose, San John Chrysostom, San Gregory of Nyssa ni mung sin ai lamu kasa hte seng nna sharin shaga ai lam ni galaw da ma ai.

Sin ai lamu kasa hte seng nna Ga Shaka Dingsa hte Ga Shaka Ningnan lahkawng yan hta lawm nga ai hpe mung mu lu ga ai. Yesu Madu tsun ai “Dai ma kaji langai mi hpe pyi nanhte n gawn n sawn n di kau myit ga, sadi nga mu. Nanhte hpe ngai tsun made ga, sumsing lamu kata e shanhte a lamu kasa ni gaw, sungsing lamu na nye a Wa a myi man hpe a mada nga ma ai,” Mt 18: 10. Dai majaw ma kaji ni hta sin ai lamu kasa ni nga nga ai lam dan dawng nga ai. Dai lamu kasa ni gaw Karai Kasang a man e mung mungkan ga a man e mung a-nga nga ma ai.

Ndai sin ai lamu kasa poi nhtoi gaw Karai Kasang anhte marai hkum shagu hpe bau sin ai hpe dum hprang shangun ai rai nga ai. Nat sadan a agung alau mahkra hta na anhte hpe makawp maga ai, n kaja ai lam mahkra hta na makawp maga ai.

Nat sadan a gumsen ai ginsen ai hta na makawp maga lu na matu anhte ni grai nan n gun kya ai ni rai ga ai. Dai majaw anhte hpe sin ai lamu kasa ni hpe jaw ya na matu Karai Kasang kaw akyu hpyi nga ga.

lamu kasa ni laban bat tup na nhtoi ni hta shi a ninghtoi hte shi yu lakawn ai lam galaw ya ai, ang ai nhtoi hta shi hpe kam hpa ai lam galaw lu na matu masat masa galaw da ai lam mung nga ai. Laban shani- Michael, Bat langai – Gabriel, Bat Lahkawng- Uriel, Bat masum – Raphael, Bat mali – Selaphiel, Bat manga – Raguel (shr) Jegudiel, Bat kyu – Barachiel.

Sin ai Lamu Kasa hte seng nna Nawku Hpung Sharin Shaga Ai Lam (10)

1. Sin Ai Lamu Kasa ni nga ai (Guardian angels exist)
2. Lamu Kasa ni galoi mung n si ai (Angels have always existed)
3. Lamu Kasa ni gaw bungli magam hta hkan nna lit magam ni hpe gun hpai nga ma ai. Lamu Kasa shagu gaw Sin Ai Lamu Kasa lit hpe sha la ai ni n rai ma ai. Sin ai lamu kasa lit magam n la ai sha kaga lit magam hpe gun hpai ai Lamu Kasa ni mung nga ai. Ga shadawn Lamu Kasa Gabriel gaw Karai Kasang a mungga htawn ya ai; Lamu Kasa Michael gaw nat sadan hpe gatsan ga de gasat kau ai. (There is an angelic hierarchy and not all angels are destined to become Guardian Angels)
4. Anhte yawng gaw Sin Ai Lamu kasa langai hpra sha lu ga ai. (We all have one)
5. Lamu Kasa ni gaw anhte ni sumsing mungdan de lu lu ai lam hpe hpaw ya ai. (Our Angel guides us on the pathway to Heaven)
6. Anhte a lamu kasa ni anhte hpe galoi mung kau da ai ngu nnga ai. (Our Angel never abandons us)
7. Lamu Kasa ni gaw galoi mung si ai ngu nnga ai wenyi ni rai nga ai. (Our Angel is not the spirit of a dead person)
8. Sin Ai Lamu Kasa ni hta mying masat da ai nnga ai. (Our guardian angel has no name)
9. Lamu kasa ni gaw anhte maga lawm nna shanhte hta nga ai atsam mahkra hte gasat lawm nga ai. (Our Angel fights on our side with all his strength)
10. Sin Ai Lamu Kasa gaw anhte a marai hkrum shagu a shi htawn shi la ya ai wa rai nga ai. Anhte hta byin ai lam yawng Karai Kasang kaw shiga jaw ai. Karai Kasang anhte a ntsa yaw sin ai lam mahkra anhte hpe shiga la sa ya ai. (Our guardian angel is also our personal messenger, charged with bringing our messages to God, and vice versa.)

Ka Lajang Ai – Fr.Patrick Gawmaw Hkawng Yae , Uploaded by Thomas Mung Hpan