Silva Mare na San Pra ai Beatrice a Poi Nhtoi 01 September 2022

Silva Mare na San Pra ai Beatrice a Poi Nhtoi (September 1)

San Pra ai Beatrice gaw, “Npawt Shut Hpyit Mara N Kap ai Sha Na-um Na-sin Rai wa ai Nu Maria a Magam Gun Wuhpung” hpe gaw de hpang dat ai San Pra ai Masha rai nga ai. Shi gaw, 1424 ning hta Portugal Mungdan, Ceuta mare kaw shangai chyinghkai wa sai. Shi hpe Brites ngu shaga ma ai; kawa gaw, Viana ginwang na uphkang du rai nga ai. Shi gaw, Hkawhkam Shayi Isabela Spain Mungdan de sa mat ai aten du hkra Isabela ni a nta kaw nga kaba wa ai. Hkawhkam shayi Isabela gaw, Spain Mungdan Castile Ginwang na Hkawhkam Yawhan (II) hte dinghku de wu ai.

Dinghku de ai hpang Isabela gaw, Spain Mungdan, Toledo mare na, Cistercian Mama Jawnwg kaw shing gyim masha a wenyi hkye la hkrum lu na matu tara shadik let sa nga mat ai. Isabela gaw aten tup Karai Kasang a myit ra galaw na matu myit tawn wu ai. Shi gun hpai sa wa na amu ni hte seng ai machye machyang hte n gun atsam shaman chyeju ni hpe Karai Kasang kaw aten shagu hpyi la ai.

San Pra ai Beatrice de hpang tawn ai Sasana Magam Gun Wuhpung a shawng na jawng gaw, Hkawhkam Jan Isabela kumhpa jaw tawn ai, Galliana mare na jawng rai nga ai. Beatrice a san seng san pra ai myit jasat, sumnung shingdi ai sat lawat hte kaga kaja ai kasi ni a majaw masha law law, shi hpang hkan ni tai wa ma ai.

San Pra ai Beatrice gaw, 1490 ning, September shata praw (1) ya shani, Toledo mare kaw, shi a asak (66) ning hta, Madu kaw yup pyaw ban sa mat wa sai rai nga ai.

San Pra ai Beatrice n nga mat ai hpang, 1926 ning, July shata  (28) ya shani hta, dai aten na Wa Sarabyin Pius (11) gaw, Shi hpe A lu ai Masha hku nna shagrau masat dat sai rai nga ai.

Dai hpang, 1976 ning, October shata  praw (3) ya shani, dai aten na, Wa Sarabyin Pawlu (6) kawn Shi hpe San Pra ai Masha hku nna dang dat let, Shi a Poi Nhtoi hpe mung, September shata Praw (1) ngu masat dat ya sai rai nga ai.

Daini Nawku Hpung gaw, Silva Mare na San Pra ai Beatrice a Poi Nhtoi galaw nga ga ai aten hta, anhte hpung masha ni mung, San Pra ai Beatrice zawn, yawng a matu, kasi kaja, jum hte nhtoi tai ya lu ai, Hkristan Hpung masha ni byin tai nga lu hkra galoi mung, shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myityina)