Siena Mare na San Pra ai Catherine a Poi Nhtoi (April 30)

San Pra ai Catherine gaw, 1347 ning, March shata (25) ya shani hta, Italy Mungdan, Siena mare kaw shangai chyinghkai wa ai rai nga ai. Shi a Kanu yan Kawa gaw, grai lusu nga pyaw ai ni rai ma ai.

San Pra ai Catherine gaw, Hkristan prat hte hkum tsup dik ai hku nna, sak hkrung hkawmsa lai wa sai rai nga ai. Shi a Asak (6) ning kaw na, shing ran law law mu lu sai; grau nna gaw, Chyoi Pra ai Hkum hkam la ngut ai hpang, dai sharing ni hpe shi mu lu ai. Asak (7) hta shi a hkum ting, Madu Yesu hpe ap jaw kau wu ai. Shi a akyu hpi ga hpe Karai Kasang hkap la ya sai ngu nna shit sun wu ai. Dai gaw, Nu Maraia lajang ya ai majaw, shi hpe Madu Yesu a num nnan shatai ya ai poi lamang de, sumsing mungdan na zaw nawng zawn wa wuhpung kaba hte wu wu di di sa shajang ai shingran hpe shi mu lu ai.

San Pra ai Catherine gaw, 1365 ning hta Dominican Mama Wuhpung “Third Order of St. Dominic” de shang nna, jam jau jam hkau hkam sharang ai hte akyu hpyi shaja nna nga ai. Shi gaw, chyawm dinglik ai lam, manang n shatai hkrum ai lam ni hpe law law lang hkrum sha lai wa sai. Raitimung, shi a matu Karai Kasang a yaw shada da ai lam hpe gaw, shi sadi dung kangka ding yang rai nga ai. Shi hpe machyi makaw hkrum ai ni, htawng ai ni hpe sa yu gawan na lit shatsam ma ai.

Bai nna, Shi gaw, rau ai aten ni hta, shi a “The Dialogues” (Bawng Ban Ai Lam Ni) ngu lachyum lu ai Lika buk hpe ka ai. Dai laika buk hpe, Chyoi Pra ai Wenyi shadan shalen ya ai chyeju atsam hte k aka rai nga ai. Grai manu dan akyu rawng ai laika (400) mung ka kau da sai. Mungkan a htoi san tsawm htap ai lam hte seng nna ka da nga ai. Shi gaw, masha hpe hkungga la ra chye ai, hku hkau chye ai, makoi magap tsep kawp n lawm myit n lawm, myit asan sha rai chye kanawn mazum ai lam gaw, dan dawng nga ai.

1375 ning na lani mi hta, shi gaw, Pisa mare kaw San Christina Nawku Jawng kata kaw akyu hpyi nga yang, Madu Yesu a Wunma Hkang (Stigmata) shi kaw kap wa ai. Shi a san Pra ai myit jasat a majaw, shada lapran mang hkang byin ai shara, shada chye na shut ai lam pru ai kaw shi hpe sa du hparan ya shangun ma ai. Shi hpe akyu hpyi myit sumru yu ai, akyu hpyi ai, tinang a lai kyang hpe gram shading sharai ai lam hta hpaji jaw, lam woi shatai shangun ma ai.

Catherine gaw, 1380 ning, April shata (29) ya shani, shi a asak (33) ning sha naw rai yang, Madu kaw yup pyaw ban sa mat wa sai rai nga ai. Raitimung, Nawku Hpung a Hpaji Ning Hkring (Doctor of the Church) nga nna shagrau sha-a hkrum ai amyu shayi sha langai mung rai nga ai.

Shi n nga mat ai hpang, 1461 ning, June shata (29) ya shani hta, dai aten na Wa Sarabyin Pius (II) gaw, shi hpe San Pra ai masat dang dat let, shi a Poi Nhtoi hpe mung, April shata (30) ya shani masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)