Sicily Mare na San Pra ai Agatha a Poi Nhtoi (February 5) 05 February 2023

Sicily Mare na San Pra ai Agatha a Poi Nhtoi (February 5)

          San Pra ai Agatha gaw, Catania mare kaw makam masham a majaw, sat kau hkrum ai San Pra ai masha rai nga ai. Shi gaw, A.D (231) Ning daram hta Sicily mungdan na Lusu nga pyaw ai kun dinghku kawn shangai chyinghkai wa ai rai nga ai.

Ma kaji ten kaw nna san seng san pra rai, kun dinghku n de ai sha shi a hkum hpe Karai Kasang kaw ap tawn da nu ai. Shi hpe hkungran la mayu ai shabrang ni grai law ma ai. Shanhte kaw na langa mi rai nga ai, ahkang aya kaba lu ai Senator Quintanius mying ai wa gaw, Shi hpyi shawn ai ga hpe Agatha n hkap la ya ai majaw, Agatha hpe tara rung de shawk bang kau wu ai.

A.D (250) daram hta gaw, Decius uphkang du wa Nawku Hpung hpe laja laja rai nna zingri shamyit nga ai aten mung rai nga ai. Dai uphkang du wa gaw, hkawn ji Agatha hpe shawa num ni a ningbaw rai nga ai Aphrosidia mying ai num jan a lata de ap kau wu ai. Raitimung, San Pra ai Agatha gaw, Madu Yesu garum ya ai shaman chyeju atsam a majaw, shi a myit hpe ngang ngang rai hkang da nhtawm, n hkrit n tsang ai sha ning hkap kau lu sai rai nga ai.

Shata mi gung lau yu nna, n awng dang ai majaw, Agatha hpe panep ntsa taleng da nhtawm, hpri ju ni hte shi a hkum hpe mahkyit shatsang ya ma ai. Dai hpang shi a madoi chyu hpang hpe abrep shatsang nna gadoi di kau ya ma ai. Mali ya dai zawn zingri shatsang nna pat chyen ni hte gayau gaya rai ju tawn ai wan n-tawng ni a ntsa kaw Agatha hpe sin-gu krin rai taleng da ma ai. Dai hpang shi hpe sharawng tawn ai htawng de bai hpai wa ma ai.

Shaloi Agatha gaw; “Nye a hkye la Madu e, Nang gaw mungkan a tsawra ai lam kaw nna ngai hpe shaga la nit dai; zingri shatsang ai lam ni hpe myit galu kaba ai hte hkam sharang lu ni ai. Nye a Wenyi hpe ya hkap la ya rit” nga nna akyu hpyi wu ai. Agatha hpe, lahta de tsun lai wa sai hte zingri sat kau lai wa ma ai.

Agatha n nga mat ai hpang, Nawku Hpung hpe Shi hpe Makam Masham a majaw, sat kau hkrum lai wa ai San Pra ai Masha hku nna dang dat let, Shi a Poi Nhtoi hpe mung shaning shagu February shata (5) ya shani masat shagrau dat ya sai rai nga ai.

San Pra ai Agatha gaw, Hkum Shan Mazut Roi Rip Hkrum ai ni, Anu Gayet Zingri Zingrat Hkrum ai ni, tsirung sarama ni, sinda hte seng nna machyi makaw hkrum ai num ni, (Grau nna Sinda Shan Mawng Ana) Hkrum sha ai ni hpe lak san kam hpa shamyet lu ai San Pra ai amyu shayi sha mung rai nga ai.  

Nawku hpung kaw nna, daini San Pra ai Agatha a Poi Nhtoi hpe galaw nga ga ai aten hta, anhte prat hta mung, Makam Masham a majaw, lam magup hku nna zingri zingzat lam ni hkrum wa ai raitim, tinang lu da sai makam masham hpe maju jung ngang kang let, gwi gwi sak se hkam lu ai nib yin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)