Share Shagan San Pra ai Leo a Poi Nhtoi @ Leo the Great (November 10) 10 November 2023

Share Shagan San Pra ai Leo a Poi Nhtoi @ Leo the Great (November 10)

San Pra ai Leo gaw, mying dan hkung htum Sarabyin ni kaw na malawm langai mi rai nga ai. Shi gaw, A.D (400) hta Roma mare kaw shangai chyinghkai wa ai rai nga ai. Laika hpaji lam hta lak lai ningtawn ai; yu mau na daram shaman chyeju atsam lu la ai wa re majaw, shi hpe Sarabyin a amu madu (Secretary) lit shatsam ya ma ai. A.D (440) ning hta gaw, shi Jau tai wa sai rai nga ai. Sarabyin n nga mat ai shaloi, seng ang ai ni yawng gaw, shi hpe kabu gara jawm madi shadaw let Sarabyin aya dang da ma ai.

Sarabyin Leo gaw, Nawku Hpung a madang hpe tau nna, kadai mung n myit mada tawn ai madang de sharawt shatsaw da ya lu sai. Makam masham hte seng nna shi a awng dang dik ai bungli gaw, A.D (451) ning hta Chalcedon mare kaw galaw lai wa sai Nawku Hpung Ting a Zuphpawng Kaba rai nga ai. Dai Chalcedon Zuphpawng Kaba hta Eutyches mying ai wa sharin shabra shut shai tara lam ni hpe ning hkap kau nna, Madu Yesu shing gyim atai sa la ai lam hpe asan sha sang lang sharin dan ai hpang, madi shadaw ya lu sai. Eutyches ngu ai wa gaw, “Madu Yesu gaw, Karai Kasang atai sha lu ai; Madu Yesu gaw masha atai n sa la ai” nga nna shut shai ai tara hpe sharin lai wa ai wa rai nga ai.

Dai Zuphpawng Kaba kaw nna, daw dan shagrin masat dat ai laika hpe, Wa Sarabyin Leo hti dat ai shaloi, zuphpawng hta sa du dung nga shajang ai Saradaw ni yawng gaw, “Petru gaw, Leo hku nna sharin shaga nga ai law” (Peter has spoken through Leo) nga nna nsen langai sha hte kabu gara jahtau tsun pru wa ai lam sakse nga nga ai. Chyoi pra ai Kahtawlik Nawku Hpung gaw, “Madu Yesu hpe Karai Kasang atai hte Shinggyim Masha atai, atai lahkawng-marai langai re.” nga nna sharin ya let kam kaba da ai ahkyak dik masham masham mung sung kaba langai mi rai nga ai.

A.D (452) ning hta “Karai a Dam Jaw ai Shingna” (Scourge of God) nga nna mying kaba ai Hun amyusha ningbaw Attila gaw, Roma Mare kaba hpe gasat la na matu shi a hpyen hpung kaba hte htim sa wa ai. Dai majaw, mare masha ni grai hkrit tsang nga ma ai. Roma mare kaw na hpyen la law law mung hprawng pru mat wa ma ai. Dai Shaloi Sarabyin Leo gaw, Attila hpe Wudang Sumla madun let, shi a shara de bai n-htang wa mat na matu ninghkap dan wu ai.

Dai lam hte seng nna, Nawku Hpung hkai hkrat wa ai mabyin langai mi nga ai. Dai mabyin hta, Wa Sarabyin Leo a shingdu kaw San Pra ai Petru hte Pawlu hpe mu lu ai nga ai. San Pra ai Kasan yan gaw, Nawku hpung hpe hkye maga la na matu, sumsing mungdan kaw nna ginding aga ntsa de yu wa na hkyen nga ai hpe mu lu ai nga ai. Dai shingran hpe mu ai majaw, Attila gaw, ja ja rai hkit kajawng mat nna, shi a buga de kalang lata bai n-htang mat wa ai nga nna tsun hkai hkrat wa nga ai.

San Pra ai Sarabyin Leo gaw, shi galaw kau sai shut hpyit mara ni hpe raw kau ya hkrum lu na matu Kasa Petru a lupwa kaw akyu sa hpyi ai. Shaloi Kasa Petru gaw, shi kaw sa dan pru nhtawm, “Nang tang da ya lai wa sai chyoi pra ai ahkang aya ni hte seng ai mara hta lai nna kaga mara ni yawng kaw nna nang hpe Karai Kasang mara raw ya sai.” ngu nna tsun ai. Dai mabyin a hpang kaw nna shi gaw, Jau aya hkam ai shaloi, myit su myit kung ai, atsawm sha myit jahkut lu sai, atsawm sha shaman shakyang sharin hkam la sai ni hpe chyu sha, Jau shatai Sacrementu hkam ya mat wa nu ai.

San Pra ai Sarabyin Leo gaw, A.D (461) ning, November shata (10) ya shani hta, Madu kaw yup pyaw ban sa mat wa sai rai nga ai. Shi a nrut nra ni hpe Vatican Nawku Htingnu kata kaw makoi mayang da ya sai rai nga ai.

San Pra ai Sarabyin Leo n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, November shata (10) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Wa Sarabyin Leo a Poi Nhtoi hpe galaw nga ga ai aten hta, Wa Sarabyin Leo zawn, kaning re ai magam bungli hta raitim, sadi dung kang ka ai hte galaw shakut let, tinang a makau grup yin, manaw manang ni, nawku hpung masha ni shatsam wa ai lit magam rai jang, ning hkap ai lam n nga ai sha, shagrit shanem let hkam la lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)