Seville Mare na San Pra ai Leander a Poi Nhtoi (February 27) 27 February 2023

Seville Mare na San Pra ai Leander a Poi Nhtoi (February 27)

          San Pra ai Leander gaw, Spain mungdan Cartagena mare kaw shangai chyinghkai wa ai. Shi a kanu yan kawa gaw, makam masham hte seng nna grai mying kaba ai ni rai ma ai. Shanhte a nta masha ni kaw nna, Nawku Hpung hta san pra ai masha jahpan shang law law byin tai wa ma ai. Shi a kahpu yan rai nga ai, Saradaw Isidore hte Saradaw Fulgentius, kana Florentina ni gaw, Sanpra ai masha jahpan shang ni rai nga ma ai.

Spain mung kaw na, Kahtawlik Nawku Hpung gaw, shi hpe hpaji ninghkring ngu nna masat shagrau ya ga ai. Shi a machye machyang hpaji hta ningtawn ai majaw hte Hkristan Mungkan shabyin shatai lu hkra shaku tai majaw, masha law law makam masham lu la ma ai. Dai masha ni kaw Visigothic hte Suevi amyu sha ni hte Visigothic hkawhkam Leovigild a kasha shadang sha yan mung, Nawku Hpung de gale shang wa ma ai. Hkawhkam Leovigild gaw, Arian a shut shai tara “Yesu gaw Karai Kasang n re” nga ai hpe hkap la ai wa re. Dai majaw, Hkawhkam gaw, Saradaw Leander hpe Constantinople de gawt shaden kau wu ai.

Dai mare kaw yen ra nga ai laman Saradaw Leander gaw, dai ten Constantinople mare kaw Sarabyin a Dat Kasa lit hte htawm hpang de Sarabyin Gregory the Great ngu mying kaba ai Sarabyin hte grai hku hkau chyap la lu sai. Saradaw Leander hpaji jaw ai majaw, Sarabyin Gregory gaw, Yob (Yoba) a laika hpe sang lang dan ai “Moralia” ngu ai laika hpe ka da lu sai rai nga ai.

Saradaw Leander gaw, Spain mungdan ka w na Arian hpung shang ni law law hpe Nawku Hpung de bai woi gale shang wa lu shangun sai. Toledo Ginwang Zuphpawng hpe mung shi woi awn lawm sai. Toledo Zuphpawng gaw, Aria a shut shai ai sharin sahga lam ni hpe ninghkap ya lu sai; Karai Kasang langai hta Numrai masum nga ai mung sung ga sung hpe mung yawng chye madat hkap la lu hkra sharin shaga ya lu sai.

Shi gaw, Roma hpe Ginjaw shatai ai ni jawng jau ai Misa Nawku magam hta Nice Mare Hpung Zuphpawng kaw nna jahkrat masat ya ai: Kasa Ni a Makam Masham “Nicene Creed” hpe shawng asung jashawn lang ai Saradaw mung rai nga ai. Saradaw Leander gaw, Mama Wuhpung Magam Gun Wuhpung ni hte seng ai madung hkan sa tara hkrang ni hpe mung ka lajang da ya ai. Dai hkan sa tara madung ni hpe masha law law kawn madi shadaw ya let hkap la nga ma ai.

Saradaw Leander gaw, A.D 600 ning mayan hta Madu kaw yup pyaw ban sa mat wa sai rai nga ai. Shi a shara hta Seville mare kaw, shi a kanau Isidore gaw, Saradaw aya galai gunhpai na lit dang da hkrum wu ai.

Saradaw Leander n nga mat ai hpang, Nawku hpung gaw shi hpe e San Pra ai masha dang da let, shi a Poi Nhtoi hpe mung, February shata (28) ya shani masat shagrau dat sai rai nga ai.

Daini Nawku hpung gaw, Seville mare na San Pra ai Saradaw Leander a Poi Nhtoi hpe galaw nga ai aten hta, anhte hpung masha ni mung, tinang a dinghta asak hkrung nga ai laman hta ra ang ai magam bungli ni hpe sadi dung kang ka ai hte gun hpai hkawmsa lu ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service