Servite Magam Gun Wuhpung Gaw De Ai Marai (7) a Poi Nhtoi (February 17)

Nu Maria a Shangun Ma “Order of Servants of Mary” Magam Gun Wuhpung hpe Italy Mungdan kaw, San Pra ai marai (7) gaw, 1233 ning hta gaw de hpang dat sai rai nga ai. Dai marai (7) gaw, Bounfiglio Monaldo, Alssesio Falconieri, Benedetto dell Antell, Bartolomeo Amidie, Ricovero Uguccione, Gerardio Sostegni hte Giovanni Buonagiunta ni rai nga ai.

Ndai San Pra ai masha ni a aten, Florence mare gaw, grai lusu nga pyaw ai mare mung rai nga ai. Mung masa n sim sa ai mare, makam masham hta n gun kya ai mare mung rai nga ai. Ndai san pra ai masha ni marai (7) gaw, lusu nga pyaw ai ni rai ma ai hte shanhte gaw, Nu Maria hpe alak mi rai tsawra hkungga myit rawng ai majaw, akyu hpyi shaja ai hte kaja ai amu galaw nna shanhte yaw shada ai lam chyam bra wa hkra galaw na myit jahkut da ma ai.

1233 ning na, Nu Maria Sumsing Lamu de shalun la hkrum ai Poi Kaba shani hta shanhte gaw, Nu Maria hpe mu lu ma ai. Nu Maria gaw, shanhte hpe akyu hpyi shaja nna, masha hpawng hte kasu kabrawng re ai shara ni hpe koi nhtawm, simsa ai shara kaw nga na matu shakut ai. Dai majaw, shanhte gaw, shanhte a ja sutgan ni hpe nta masha ni a matu san san garan kau da ya nna, shanhte lu ai kumhtaw kaw nag aw, matsan masha ni hpe gam garan jaw kau da nhtawm, shanhte a hkum hkrang myit masin yawng hpe Karai Kasang kaw ap nawng kau ma ai. Dai hpang Monte Senario shara kaw n kam lu na daram nan lagyim nna tara shadik let nga nga ma ai.

Shanhte hpe 1240 ning hta shanhte a Saradaw Ardiongo sa du jahkrum nna, “Nanhte a ngasat ngasa ladat gaw, matse labye dusat ni a ngasat ngasa ladat hte maren she rai nga ai; she madat yu mu; wenyi a tai hpyen wa gaw, Nhtoi a lamu kasa zawn makoi nga chye ai yaw.” ngu nna shadum ya wu ai.

Shanhte mung, Karai Kasang kaw na shadan shaleng ai chyeju atsam hpyi ma ai. Dai hpang kade nna yang, Nu Maria shanhte kaw lahkawng lang ngu na bai sa dan pru sai. Shaloi Nu Maria a lata hta shanggan achyang lang da nga ai. Lamu Kasa langai mi gaw, “Nu Maria a Shangun Ma ni” ngu ka da ai maisau pa langai mi shi a lata hta lang da nga ai. Nu Maria gaw, shanhte hpe Shi a shangun ma shatai na matu lata sai majaw, shanggan achyang lawai hpun htawm, San Pra ai Augustine a hkansa ritkawp tara hpe hkan shatup na matu sa matsun wu ai. Shanhte a Saradaw tsun shadut ai majaw, shanthe marai (7) gaw, Jau Tai Sacramentu hpe hkam la masai.

Ndai “Nu Maria a Shangun Ma ni” (Order of Servants of Mary) wuhpung hpe 1304 ning hta, Wa Sarabyin Benedict (XI) kawn madi shadawn masat shagrin dat ya sai rai nga ai.

Shanhte hpe 1717 ning, December shata praw (1) ya shani hta, dai aten na Wa Sarabyin Clement (XI) kawn A lu ai masha ni hku nna shagrau dat ya sai.

Bai 1887 ning hta gaw, dai aten na Wa Sarabyin Leo (XIII) kawn, shanhte marai (7) hpe san pra ai masha ni hku nna dang dat let, shanhte a Poi Nhtoi hpe mung, February shata (17) ya shani ngu masat shagrau dat sai rai nga ai.

Daini Nawku hpung gaw, “Nu Maria a Shangun Ma ni” (Order of Servants of Mary) ni a Poi Nhtoi hpe galaw nga ga ai hte maren, anhte marai hkum shagu mung, tinang a lusu ngamu ngamai lam ni hpe hkrai n myit marin taw ai sha, Karai Kasang Wa a myit ra sharawng ai lam ni hpe galoi mung sawn dinglik yu let, mai kaja ai hte sak hkrung hkawmsa lu na chyeju atsam jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service