Sep 6 Garrigues Mare na A Lu ai Bertrand a Poi Nhtoi 06 September 2022

Garrigues Mare na A Lu ai Bertrand a Poi Nhtoi (September 6)

A Lu ai Bertrand gaw, 1195 ning hta, Fransik Mungdan, Comtat Venaissin Ginwang, Garrigues mare hta shangai chyinghkai wa ai rai nga ai. Shi gaw, Cistercian Mama ni a jawng kaw laika hpaji sharin hkam la lai wa nna, Cistercian Magam Gun Wuhpung hta Jau tai wa sai rai nga ai.

A Lu ai Bertrand gaw, Midi Ginwang na, Hpung htak ai ni kawn hpang da ai shut shai tara a mang hkang lam ni hpe tsep kawp shamyit kau na matu, Cistercian Magam Gun Wuhpung de shang wa ai mung rai nga ai. Raitimung, shanhte a Jau Kaba gaw, 1208 ning hta sat kau hkrum ai majaw, shanhte yaw shada ai lam n awng dang mat wa ai.

Dai hpang shi gaw, akyu hpyi ai, lusha gam ai, tara hkaw ai laknak ni hpe madung tawn nna shut shai tara hpe shamyit shatsai kau lu ai San Pra ai Dominic hte hkrum ai. Shi gaw, San Pra ai Dominic a hku hkau dik manang langai mi tai wa sai. Shanhte gaw, 1215 ning hta, “Tara Hkaw Wuhpung” (Order of Preachers) mying ai Magam Gun Wuhpung hpe de hpang dat ma ai.

Dominican Magam Gun Wuhpung hpe yu gawn ai ginwang yawng rai yang (8) rai nga ai. A Lu ai Bertrand gaw, dai ginwang hpe yu na matu, Provence ginwang a Jau Kaba “Prior Provincial of Provence” lit shatsam ya hkrum sai. Shi hpang jahtum (9) ning sak hkrung ai ten hta Marseillles mare kaw na Priopry Jawng Kaba hpe mung, gaw gap hpang da ya sai. Dingda Fransik Mugndan hkan mung tara hkaw hkawm lai wa sai rai nga ai.

A Lu ai Bertrand gaw, 1230 ning, April shata (18) ya shani hta, Fransik Mungdan, Garrigue mare hta e, Madu kaw yup pyaw ban sa wa sai rai nga ai.

A Lu ai Bertrand n nga mat ai hpang, 1881 ning, July shata (14) ya shani, dai aten na, Wa Sarabyin Leo (13) kawn Shi hpe A Lu ai Masha ngu shagrau dat nna, Shi a Poi Nhtoi hpe mung September shata (6) ya shani masat dat ya sai rai nga ai.

Daini Nawku Hpung gaw, A Lu ai Bertrand a Poi Nhtoi hpe galaw nga ga ai aten hta, anhte Hpung Masha ni mung, N Jaw, N Teng N Man ai lam ni hpe galoi mung ning hkap kau nna, Jaw teng ai Nawku Hpung a Sharin matsun lam ni hpe hkan sa shatup let, yawng a matu, nhtoi tai ya nga lu hkra shakut nga ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)