San Pra ai Wolfgang a Poi Nhtoi (October 31) 31 October 2023

San Pra ai Wolfgang a Poi Nhtoi (October 31)

San Pra ai Wolfgang  gaw, A.D (925) Ning hta, Germany Mungdan, Suabia Mare kaw shangai chyinghkai wa ai rai nga ai. Lake Constance Zinlawng mayan, Reichenau Mare na, Jau Jawng kaw laika hpaji sa sharin hkaja lai wa ai. Dai hpang gaw, Germany Mungdan, Wurburg hte Trier mare na Laika Sharin Jawng hta e, Sharin Sara sa tai lai wa ai. Saradaw Kaba Henry hpe shi a giwang na gram galai ra ai lam ni hta mung, Jau Ramhold hte rau garum ya lai wa sai rai nga ai. Saradaw Kaba n nga mat ai hpang shi gaw, Switzerland Mungdan, Einsiedelm mare kaw na, Benedictine Jau Jawng kaw sa shang mat nu ai.

Dai Jawng kaw mung, shi gaw, gram hpajang ra ai magup sumhpa hte seng nna lit shatsam ya ai hpe hkrum nu ai. Wolfgang mung, lam shagu hta atsawm rai nna galaw gram ya sai. Dai hpang, Shi Jau tai wa sai. Shi Jau tai ngut ai hte rau Roma asuya uphkang ai Hungary Mungdan, Pannonia shara de htawt nga mat ai. Dai shara makau gaw nga shajang ai Magyar Amyusha ni hpe, Karai Kasang a lam sharin ya na matu rai nga ai. Raitimung, shi yaw shada da ai hte maren, grai wa n awng dang mat wu ai. Dai kaw nga ai nau n na yang, Shi gaw, Ratisbon mare a matu, Saradaw aya dang da ai hpe hkrum nu ai.

Saradaw Wolfgang gaw, atsim sha nga nna tara shadik mayu ai raitim, Saradaw rai nga ai hte maren, Masha wuhpung wuhpawng hte galoi mung matut mahkai ra nga nu ai. Dai hpe Karai Kasang myit ra shabyin ai re ngu nna, shi hkap la lai wa sai lam, shi a labau hta ka matsing da nga ai. Ginwang a galu kaba lam, gram shalai shai ra ai lam ni hpe azin ayang rai nna, awng dang hkra galaw lai wa sai. Saradaw Wolfgang gaw, masha ni hpe wenyi lam woi ning shawng kaja tai let, Shi a Jau ni hpe mung kasi kaja madun nhtawm, lam shagu hpe atsawm sha woi galaw ya lai wa ai. Dai majaw, Shi a masha ni gaw, Shi hpe grai hkungga let, madat mara tsawra kam hpa lai wa ma ai.

 San Pra ai Saradaw Wolfgang gaw, dai zawn rai nna, Sasana Magam hta shi a Jau Manang ni hte n hkring n sa shakut nga ai aten, A.D 994 ning hta, Madu kaw yup pyaw ban sa mat wa sai rai nga ai. Shi a san seng san pra ai myit jasat hte nga sat nga sa lam shiga ni gaw, shi n nga mat hpang mung, grai kajai gum hkawng mat wa sai rai nga ai.

Dai majaw, Nawku Hpung kawn mung, 1052 ning hta, Saradaw Wolfgang hpe San Pra ai Masha dang dat let, Shi a Poi Nhtoi hpe mung, October shara (31) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Saradaw Wolfgang a Poi Nhtoi hpe galaw nga ga ai aten hta, anhte a prat hta mung, tinang a dum nta masha, manaw manang ni hte makau grup yin a matu, ning htoi tai, kasi kaja madun chye ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)