San Pra ai Wilfrid a Poi Nhtoi (October 12) 12 October 2023

San Pra ai Wilfrid a Poi Nhtoi (October 12)

San Pra ai Wilfrid gaw, Ireland Mungdan, Northumberland kaw lai wa nna, A.D (634) ning hta shangai chyinghkai wa ai rai nga ai. Shi gaw, Lindisfame, Lyons hte Roma mare hkan laika hpaji sharin la ai. Shi a asak (24) ning du ai shaloi, A.D (658) ning hta England Mungdan, Ripon Mare kaw, ginwang up Jau lit shatsam ya hkrum sai.

Jau Vilfrid gaw, England Mungdan, Dingdung maga de du ai shaloi, Nawku Daw Jau Lamang hta Celtic (Moi na English Amyu Hpan) ni a hkrang hpe n lang ai sha Roma Hkrang lang nna Nawku woi ai. Whitby mare Zup Hpawng (Conference of Whitby) kaw nna Roma Hkrang lang ai maga de lawm ai ni dang mat ai gaw, Jau Wilfrid a majaw mung rai nga ai.

Shi gaw, York mare na Saradaw aya tang da hkrum ai; dai ahkang aya hkap la na matu shi hpe dingbai dingna jaw ai ni nga timung, A.D (669) ning hta shi apyaw angawn awng dang lu mat ai. Saradaw Wilfrid gaw, sari shingkang kaba ai wa mung re; shi galang mi daw dan tawn ai hpe ta tut ngang ngang hkan shadik ai masha rai nga ai.

Cantebury mare na, San Pra ai Saradaw Theodore gaw, York Saradaw Ginwang hpe garan masat na matu shawa masha ni hpe zinlum wu ai. Ndai mang hkang a lam Saradaw Wilfrid gaw, Ginju Roma Mare de shana ya ai raitimung, Roma mare kaw na garai n hparan ya lu yang, Saradaw Wilfrid hpe York mare kaw nna gawt shapraw kau ma ai. Dai majaw, Shi gaw, England Mungdan dingda maga kaw sa nga ra ma ai. Dai shara kaw nga shajang ai Saxon amyu sha ni hpe makam masham sharin achyin ya nga ai laman, A.D (686) ning hta shi hpe York mare de bai shaga la ma ai.

Saradaw Wilfrid gaw, A.D (703) ning hta asak kaba mat nna amu magam kaw hkring sa la mat nhtawm, A.D (709) ning hta, Shi shawng nnan ginwang up Jau lit magam gun hpai lai wa ai, Ripon Mare na Jau Nta hta e, Madu kaw yup pyaw ban sa wa sai rai nga ai.

San Pra ai Saradaw Wilfrid gaw, German amyu sha ni law law hpe Kahtawlik Makam Masham de woi jashawn ai lam hta ninghtawn ai English amyu sha San Pra ai Saradaw mung rai nga ai.

San Pra ai Saradaw Wilfrid n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, October shata (12) ya shani masat shagrau dat sai rai nga ai.

Daini Nawku Hpung gaw, San Pra ai Saradaw Wilfrid a Poi Nhtoi hpe galaw nga ga ai aten hta, anhte hpung masha ni mung, Wa Saradaw Wilfrid zawn, jasam maigan masha ni hpe madu a kabu gara shiga hkaw matsun gat hkai lu ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)