San Pra ai Wa Sarabyin Yawhan Pawlu (II) a Poi Nhtoi (October 22) 22 October 2022

San Pra ai Wa Sarabyin Yawhan Pawlu (II) a Poi Nhtoi (October 22)

San Pra ai Wa Sarabyin Yawhan Pawlu (II) hpe 1920 ning, May shata (18) ya shani, Polang Mungdan, Wadowice kaw shangai chyinghkai wa ai rai nga ai. Shi kaji yang na mying gaw, Karol Józef Wojtyła rai nga ai.

Wa Sarabyin gaw, 1946 ning, November shata praw (1) ya shani Jau tai wa sai rai nga ai.

Dai hpang, 1958 ning hta Saradaw aya hpe hkam la sai. 1967 ning, June shata (26) ya shani Wa Sarabyin Pawlu (6) a lata hta Cardinal aya hpe hkam la sai.

1978 ning, October shata (16) ya shani hta gaw, Sarabyin aya dang da ai hkrum sai rai nga ai. Dai shaloi kawn, Shi a mying hpe Yawhan Pawlu (II) ngu San Pra ai mying hpe shamying la nhtawm, Sarabyin lit magam hpe gun hpai hpang wa sai rai nga ai.

Wa Sarabyin Yawhan Pawlu (II) gaw, Sarabyin magam gun prat (27) ning du hkra gun hpai lai wa nna, mungkan mungdan shara law law na hpung masha ni hpang de sa du gawan kau da ai wa mung rai nga ai.

1981 ning, May shata (13) ya shani hta Mehmet Ali Agca ngu ai wa gaw, Sinat hte Gap nna Wa Sarabyin hpe gyam sat lai wa sai rai nga ai. Karai Kasang Wa e garum makawp ya nna, Wa Sarabyin asak n hkra mat ai sha bai mai tsai wa ai. Raitimung, dai wa htawng kaw rawng nga ai ten, Wa Sarabyin hkum nan sa du gawan let, mara raw ya ai lam sa tsun lai wa sai rai nga ai. Ndai mabyin lam ni gaw, shi a kraw kata hta Madu Yesu a tsawra mying hpring tup rawng nga ai ngu ai a kumla nan mung rai nga ai.

Bai nna, Wa Sarabyin Yawhan Pawlu (II) gaw, anhte a myi chyaw hta Karai Magam gun lai wa nna, anhte a prat kaw nan San Pra ai Masha tai wa ai, Wa Sarabyin mung rai nga ai.

Ndai zawn rai nna, Mungkan mungdan shara shagu hkan na Kahtawlik Nawku hpung masha ni hpe woi awn nga ai ten, 2005 ning, April shata praw (2) ya shani, shi a asak (84) ning hta, Madu kaw yup pyaw ban sa mat wa sai rai nga ai.

Wa Sarabyin n nga mat ai hpang 2011 ning, May shata praw (1) ya shani hta, ya hkring sa mat sai rai nga ai Wa Sarabyin Benedict (16) kawn, Shi hpe A-lu ai Masha hku nna masat dat sai rai nga ai.

Dai hpang, 2014 ning, April shata (24) ya shani hta gaw, ya na Wa Sarabyin Francis hkum nan, San Pra ai Masha hku nna dang dat let, Shi a Poi Nhtoi hpe mung, October shata (22) ya shani ngu masat shagrau dat ya sai rai nga ai.

Daini Nawku Hpung kawn, San Pra ai Wa Sarabyin Yawhan Pawlu (II) a Poi Nhtoi galaw nga ga ai aten hta, Anhte hpung masha ni mung, Wa Sarabyin a kasi hpe yu la nna, tinang hpe shut hpyit tawt lai wa kau sai manang wa mara hpe raw ya lu hkra shakut nga ga law.

By;
 

Sister Rose Angeline Maran Nang Doi (SFX)

RVA-Kachin Service (Myitkyina)