San Pra ai Wa Sarabyin Pius (X) a Poi Nhtoi (August 21) 21 August 2023

San Pra ai Wa Sarabyin Pius (X) a Poi Nhtoi (August 21)

San Pra ai Wa Sarabyin Pius (10) hpe “Chyoi Pra ai Hkum hte seng ai Wa Sarabyin” Pope of the Eucharist, nga nna shagrau shamying ma ai. Shi gaw, 1835 ning, June shata praw (2) ya shani, Italy mungdan, Venice mare makau Riese kahtawng na, Yi sun hkau na galaw sha ai htinggaw kaw na shangai chyinghkai wa ai rai nga ai. Jau tai ai hpang shi a n hkring nsa bungli galaw ai hte matsan dum lama ai magam bungli hte seng nna mying kaba wa ai.

1884 ning hta Mantua Mare na Saradaw lit shatsam hkrum ai hpang (8) ning na ai shaloi, Venice mare na, Saradaw kaba lit dang da hkrum nu ai. 1903 ning hta, Sarabyin lit gun hpai na matu lata la hkrum ai shaloi masha shagu grai mau mat ma ai; hpa majaw nga yang shi gaw, hpaji hte seng nna, Asuya ni hte matut mahkai ai lam hte seng ai mahkrum madup mung n nga ai wa re. Shi gaw, Karai Kasang a masha langai mi rai nga ai sha re.

Shi hkap la nna hkan shatup ai ga matsun gaw, “To renew all things in Christ: Lam shagu hpe Hkristu hta gram shalat la na.” nga ai ga matsun hte maren nawku lam hte Ja Chyum Mungga lam hpe shi gram sharai ya ai. Shi hpe “Chyoi Pra ai Hkum hte Seng ai Wa Sarabyin” nga nna shamying shagrau ya ai gaw, shawng de asak (14) ning du jang sha Chyoi Pra Hkum hkam la lu na ahkang jaw timung, Wa Sarabyin gaw, asak (7) ning hta Chyoi Pra Hkum hkam la lu na ahkang jaw ya ai majaw rai nga ai. Shi gaw, Hpung masha ni hpe Chyoi Pra ai Hkum hpe man man hkam la na matu shadut matsun ya lai wa sai re.

Wa Sarabyin Pius (10) gaw, Nawku hpung a myit sumru akyu hpyi ai wutsawk masing hpe n gun grai jaw ai; Jau ni hpe mung, ga si ga ngau loi ai hte ading tawk tara mungga hkaw jahprang na matu matsun ya ai. Sarabyin a hkaw kata na htung masa nkau mi hpe shi nau n sharawng nna manang langai mi hpe: “Tsalun sun hta Madu Yesu hpe hpyen la ni shing grup nna rim ai zawn, ngai hpe hpyen la ni shing grup nna woi hkawm nga ma ai le!” nga nna tsun dan yu ai.

Uropa dan na mungdan ni hpe majan man n hpaw na matu, Sarabyin matsun yu timung, n awng mat ai lam nga ai. Austro-Hungary (Austria hte Hungary Mungdang) hkawhkam kaba gaw shi a hpyen hpung ni hpe shaman ya na matu, Sarabyin kaw hpyi nem ai. Shaloi Sarabyin gaw: “Ngai gaw simsa lam a matu shaman ya ai, majan hpe n shaman ya ai: I bless peace, not war” nga nna bai htan ya ai.

1914 ning hta hpang ai shawng ning nan mungkan majan byin na nhtoi loi sha ra yang, August shata (20) ya shani, Wa Sarabyin Pius (10) gaw, Madu kaw yup pyaw ban sa mat wa sai rai nga ai. San Pra ai Wa Sarabyin Pius (X) hpang jahtum ka da ai gaw: “Ngai gaw matsan mayan rai shangai wa ai; matsan mayan rai sak hkrung nga kau ni ai; matsan mayan rai nsa hti wa mayu ai.” nga nna  ka kau da nu ai.

Wa Sarayin Pius (10) hpe, 1953 ning, May shata (29) ya shani, San Pra ai masha hku nna dang dat let, shi a poi nhtoi hpe August shata (21) ya shani masat dat sai rai nga ai. Wa Sarabyin lit magam hpe gaw, 1903 kaw nna shi a asak htum ai, 1914 ning, August shata (20) ya shani du hkra, (11) ning tup magam gun lai wa sai rai nga ai.

Daini Nawku Hpung gaw, San Pra ai Wa Sarabyin Pius (10) a Poi Nhtoi hpe galaw nga ga ai aten hta, anhte Nawku hpung masha ni mung, Wa Sarabyin Pius (10) a ra sharawng ai lam rai nga ai, Chyoi Pra ai Hkum hpe man man hkam la lu hkra shakut sa wa ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)