San Pra ai Wa Sarabyin Gregory (7) a Poi Nhtoi (May 25) 25 May 2023

San Pra ai Wa Sarabyin Gregory (7) a Poi Nhtoi (May 25)

San Pra ai Wa Sarabyin Gregory (7) Hilderbran nga nna mung masha law malawng chye nga ma ai. Shi gaw, Italy Mungdan, Tuscany mare kaw, lai wa sai 1020 ning hta shangai chyinghkai wa ai rai nga ai. Laika hpaji hpe Aventine shara kaw na, St. Mary Tawra Jau Jawng kaw sharin la lai wa ai. Dai hpang Cluny mare na Tawra Jau Jawng kaba de sa shang ai. Shi gaw, hpaji machye machyang hte san seng san pra lam hte seng nna grai mying kaba ai wa mung rai nga ai.

Wa Jau Hilderbran gaw, Wa Sarabyin Leo (9) hpe Nawku Hpung kata na gram lajang shading sharai la ra ai lam ni hpe galaw garum ya ai wa mung re. Raitimung, dai gram lajang ai magam bungli n ngut kre shi yang, Wa Sarabyin Leo (9) n nga mat wa sai. Dai majaw, Wa Jau Hilderbran hpe Sarabyin lit dang dat ma ai hte Shi hkum hpe Gregory (7) ngu shamying la let, Wa Sarabyin Leo (9) galaw hpang da ai n ngut kre shi ai magam bungli ni hpe matut galaw shakre sai rai nga ai.

San Pra ai Wa Sarabyin Gregory (7) gaw, 1075 ning hta Saradaw ni a Zuphpawng Kaba (Shing n rai) Roman Synod kaw hpung magam gun aya hpe dut sha ai lam tsep kawp jahkring ya kau ai hte Jau ni kun dinghku n de ai hkan sa tara hpe mung madi shadaw let shagrin dat ya sai rai nga ai.

Wa Sarabyin Gregory (7) gaw, Mung uphkang du ni e, shanhte a gainwang hkan shanhte myit ra ai Saradaw ni hpe lata la nna shatai ai ladat hpe mung pat shingdang kau ya sai. Dai ladat a majaw, Sarabyin hte Germany Mungdan na Hkawhkam Henry (4) a lapran mang hkang byin wa ai sai hte Hkawhkam wa hpe mung Nawku Hpung a shinggan de shale kau wu ai. Dai hpang 1077 ning hta Sarabyin hte Hkawhkam Henry a lapran myit hkrum myit ra lam bai lu la sai. Raitimung, 1084 ning hta Hkawhkam Henry (4) gaw, myit bai ja wa nna, shi a hpyen hpung hte Roma Mare hpe bai gasat zing la kau nhtawm, Wa Sarabyin Gregory (7) hpe mung, Salerno ngu ai shara de gawt shapraw kau wu ai. Wa Sarabyin Gregory (7) gaw, dai shara hta sha 1085 ning, May shata (25) ya shani, Madu kaw yup pyaw ban sa mat wa sai rai nga ai.

Wa Sarabyin, shi nsa hti hkyen wa yang, Shi hpe n kaja ai hku nna galaw kau ai ni yawng hpe mara raw hkyamsa jaw kau da nu ai. Bai nna shi tsun kau da ai hta, “Ngai gaw, dingman ai lam hpe tsawra ai, n hkru n kaja ai lam hpe n ju n dawng n ngai, dai majaw, ngai ndai zawn re ai share de gawt shapraw kau hkrum nna si ai rai nga ai” nga nna tsun kau da wu ai. Dai zawn rai nna, Wa Sarabyin Gregory (7) gaw, Nawku Hpung hpe gram lajang ai lam hta teng man ai lam hpe n hkrit n tsang shading sharai na shaman chyeju atsam lu la ai San Pra ai Masha mung rai nga ai.

Shi n nga mat ai hpang, 1584 ning hta, dai aten na Wa Sarabyin Gregory (13) kawn, Shi hpe A-lu ai masha ngu masat shagrau dat ya sai rai nga ai.

Dai hpang, 1728 ning, May shata (24) ya shani hta dai aten na Wa Sarabyin Benedict (13) kawn, Shi hpe San Pra ai Masha dang dat let, Shi a Poi Nhtoi hpe mung, May shata (25) ya shani masat shagrau dat ya sai rai nga ai.

Daini Nawku Hpung gaw, San Pra ai Wa Sarabyin Gregory (7) a Poi Nhtoi hpe galaw nga ai aten hta, anhte Hpung Masha ni mung, Wa Sarabyin  zawn, tinang lu da sai makam masham lam a jaw teng ai masa hpe n hkrit n tsang sakse hkam lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)