San Pra ai Wa Sarabyin Gregory “Gregory the Great” (September 3)

San Pra ai Wa Sarabyin Gregory gaw, Share Shagan Sarabyin Kaw na Malawm (One of the greatest Popes) rai nga ai. Shi gaw, A.D 540 ning hta, Roma mare na uphkang aya kaba lu ai kanu yen kawa kaw nna shangai chyinghkai wa ai rai nga ai. Roma Mare Uphkang Du, Prefect of the City, lit hpe (5) ning tup grai awng dang ai hte gun hpai kau da ai hpang, A.D 590 ning hta Jau tai jawng de shang mat wa ai. Gregory Deacon sha naw tai nga yang, shawa masha ni gaw shi hpe Sarabyin lit gun hpai na matu lata la ma ai. Deacon Gregory gaw, dai ahkaw ahkang hpe n hkap la wam ai majaw, mare kaba kaw nna hprawng yen mat na maw yu ai. Raitimung, Hpung masha ni gaw shi hpe San Petru a Htingnu de du hkra hpai wa nna, Sarabyin shatai kau ma ai.

Sarabyin lit hpe hkap la ai hpang n hkring n sa kasa amu gun hpai ai; dai majaw shi hpe, The Great “Share Shagan” nga nna shagrau shamying ya ma ai. Sarabyin Gregory gaw, Nawku Hpung lu ai sutgan ni hpe e, tai hpyen ni e rim mat wa ai masha ni hte matsan masha ni hpe garum madi shadaw hkye la na matu jai lang ai. Roma Hkawhkam ni a maungdan Roman Empire, hten bya mat ai shaloi, mungchying sha ni hpe masha shazai ni a lata kaw na Sarabyin makawp maga da ya ai.

Sarabyin Gregory gaw, mying kaba ai “Gregorian Chant” ngu ai Nawku Lamang, Liturgy hta lang ai mahkawn mangoi laika mung shalat da ya ai sha n-ga, shawng ningnan lang England mungdan de Kabu Gara Shiga hkaw shabra na Sasana magam gun ni hpe shangun dat ai wa mung rai nga ai. Masha ni e, shagrau shakawn nna mying kaba timung, Sarabyin gaw, shi hkum hpe “Mayam ni a Mayam” “Servus Servorum” nga nna shamying la ai; ndai mying hpe shi a hkang galai ai Sarabyin ni yawng mung, matut ding yang hkap la, shamying la nga ma ai.

Laja lana re ai ana ahkya, Pestilence byin wa ai aten hta, mara a majaw jam jau hkam akyu hpyi yan hkawm ai, Penitential procession hpe Sarabyin Gregory woi galaw ai. Dai akyu hpyi yan hkawm nga yang, Lamu Kasa Mikael gaw, Hadrian a Gawknu ntsa dan pru wa ai; shi a lata hte nhtu hpe n-ga kaw nna shaw la dan ai. Dai gaw Karai Kasang jaw ai arid an jaw ten htum sai, ngu ai rai nga ai. Dai majaw, chyeju dum masat ding sat shatai nna, dai Gawknu ntsa kaw magri hte galaw da ai lamu kasa sumla hpe tawn da nga ma ai; dai hpe hpang de gaw, “Castel Sant’ Angelo” nga nna shamying ya ma ai.

Share Shagan Sarabyin Gregory gaw, A.D 604 ning, March shata (12) ya shani, shi a asak (64) ning hta, Roma mare kaw Madu hta yup pyaw ban sa mat wa sai rai nga ai. Shawa masha ni jawm myit hkrum daw dan nna, Popular acclamation hte si ai hpang kade nna yang, Sarabyin hpe San Pra ai masha nga nna masat shagrau ya ma ai. San Pra ai Sarabyin Greogry gaw, Share Shagan “the Great” nga nna shagrau hkrum ai Sarabyin marai (2) kaw na, langai mi rai nga ai.

Shi a Poi nhtoi hpe shaning shagu, September Shata praw (3) ya shani, Nawku hpung ding yang galaw ya nga ai rai nga ai. Dai majaw, daini San Pra ai Wa Sarabyin Gregory a Poi nhtoi hpe galaw ya nga ga ai hte maren, anhte a myit masin hta mung, shagrit shanem ai hte tinang mang ang ai Sasana magam hta shang lawm shakut lu na atsam jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)