San Pra ai Wa Sarabyin Damasus (I) a Poi Nhtoi (December 11)

San Pra ai Wa Sarabyin Damasus (I) gaw, Roma mare kaw, lai wa sai A.D 306 ning hta shangai chyinghkai wa ai rai nga ai. Shi gaw, makam masham a majaw, sak kau hkrum lai wa ai, San Pra ai masha ni hpe hkungga jaw shagrau ya ai hpe masat shagrin dat ya ai Sarabyin rai nga ai.

A.D 366 ning hta, Sarabyin Liberius n nga mat wa ai hpang, shi hpe Sarabyin aya dang da hkrum sai rai nga ai. Dai hpang Sarabyin ni hpe n ju dik ai (Shing n rai) Antipope Ursinus gaw, laja lana ning hkap ai sha n-ga, mang hkang kaba byin hkra dingbai dingna jaw lai wa sai rai nga ai.

Sarabyin Damasus gaw, Sarabyin lit magam hpe (18) ning tup gun hpai lai wa sai rai nga ai. Shi gaw, myit grai su ai hte hpaji mung kung kyang ai wa re majaw, San Pra ai Jerome ka lajang taw ai, Chyum Laika “Vulgate” hpe madi shadaw ya sai. Valgate dai gaw, daini na aten du hkra Nawku Hpung kata ahkyak madung tawn da ai Chyoi Pra ai Chyum Laika rai nga ai. San Pra ai Jerome gaw, San Pra ai Sarayin Damasus a rung hta (3) ning magam gun hpai lai wa sai mung rai nga ai.

Sarabyin Damasus hpe San Pra ai Jerome gaw; “Nawku Hpung Ajet a Hpaji Ninghkring Ajet (Shing n rai) A Virgin Doctor of a Virgin Church” nga nna shagrau lai wa sai. Sarabyin gaw, Ga Shagawp gawp ai lam hta mung grai ram ai wa re; dai hta sha n-ga shi a shagrit shanem myit, matsan masha ni hpe matsan dum chye ai myit, si mani ai sat lawat, Sanseng Sanpra ai myit jasat ni hpe Nawku Hpung gaw, galoi mung myit dum shagrau ya nga ai.

San Pra ai Damasus gaw, makam masham a majaw, si hkam ai ni hpe hkungga jaw ai masing hpe, masat shagrin ya ai majaw mung mying grai dan hkung ai wa rai nga ai. Bai nna, tara sakse ni a lupwa hkan Chyum Ga ni hte ka shatsawm let shagrau ya hpang ai wa mung rai nga ai. Dai ni kaw na, mying kaba dik ai lam gaw, San Pra ai Sarabyin Callistus a Lupwa kaw shi ka da ai; “Ngai Damasus mung ndai kaw lup da hkrum mayu ai raitimung, ndai San Pra ai masha ni a Chyoipra ai nrut nra ni hpe roi ai tai wa na hpe ngai myit tsang ai.” nga ai ga yan rai nga ai.

Shi gaw, A.D 384 ning, December (11) ya shani, madu kaw yup pyaw ban sa mat sai rai nna, shi a hkum tsawp moi mang hpe Ardatina lam ngu ai (Ardatina Way) ngu ai shara kaw shi gap da ai Nawku Jawng kata hta makoi mayang da sai rai nga ai.

Shi n-nga mat ai hpang, Nawku hpung kawn shi hpe san Pra ai masha hku nna dang da let, shi a poi nhtoi hpe December (11) ya shani, shaning shagu myit dum galaw ya nga ai rai nga ai.
Anhte hpung masha ni mung, daini San Pra ai Wa Sarabyin Damasus (I) a Poi Nhtoi shani hta, shani shagu na anhte a sak hkrung hkawmsa ai hkrun lam hta, San Pra ai Wa Sarabyin Damasus a kasi ningli ni hpe la nna, hkawmsa lu hkra shakut nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)