San Pra ai Wa Jau Bernadino Realino a Poi Nhtoi (July 02) 02 July 2023

San Pra ai Wa Jau Bernadino Realino a Poi Nhtoi (July 02)

San pra ai Bernadino gaw, Italy Mungdan, Capi mare hta, 1530 ning, December shata praw (1) hta Lusu ai kanu kawa ni kaw nna shangai chying hkai wa ai rai nga ai. Kanu kaw na, Hkristian hpaji hpe sharin la nna, tsi hpaji hpe Bologna Dakkasu kaw sharin hkam la lai wa sai. Dai hpang tsi hpaji a malai hkansa ritkawp tara hpaji (Law) hpe galai sharin la nna 1563 ning hta tara Janmau gup la lu sai. Shi a tara hpaji atsam the bungli hta kangka ai myit jasat ni a majaw mying kaba wa nna Naples mare hta jahpan jep lit hte ningtau du up, Lieutenant General aya hpe dang da hkrum nu ai.

Hpang daw de, shi gaw Karai Kasang a magam gun na myit rawng wa ai: grau nna Nu Maria shi kaw sa dan pru ai hpang kaw na, Jesuit Jau Wuhpung de shang na matu, 1567 ning hta myit hkut daw dan nu ai. Naples mare hta matsan masha ni hte ramma ni hpe yu gawn ai lit magam gun hpai let nga kau da nhtawm, shi a hpang jahtum (42) ning tup Italy Mungdan Lecce mare kaw magam gun hpai let nga lai wa sai.

San Pra ai Wa Jau Bernardino gaw, mara raw ya ai Jau ni a kasi “A Model Confessor” ning tawn ai mungga htawn ai wa, “Powerful Preacher”, ramma ni hpe makam masham hte seng ai lam hta myit su myit kung ai ladat hte sharin shapan ya lu ai atsam rawng ai wa rai nga ai. Bai nna kangka ai wenyi sagurem wa tai nna, Lecce mare na Jusuit Jau ni a Dakkasu jawng up hte Jesuit Jau ni a ningbaw lit magam hpe mung gun hpai lai wa sai rai nga ai.

San Pra ai Wa Jau Bernerdino hpe shi a mare masha ni grai tsawra kam hpa lai wa ma ai. Ya na zawn, Wa Jau gaw, 1616 ning hta machyi kaba hkrum wa ai shaloi, dai Lecce mare na tara agyi ni gaw, ndai mare hpe galoi mung yu makawp maga ya na matu, Wa Jau hpe hpyi lajin lai wa masai. Wa Jau gaw, dai shaning July shata praw (2) ya shani, shi a asak (85) ning hta, Madu a lahpyen hta e yup pyaw ban sa mat wa sai rai nga ai.

Wa Jau n nga mat ai hpang, 1896 ning, January shata (12) ya shani, Wa Sarabyin Leo (13) kaw nna, Shi hpe A Lu ai Masha ngu masat shagrau dat ya sai.

Dai hpang, 1947 ning, June shata (22) ya shani gaw, Wa Sarabyin Pius (12) kawn, Shi hpe e, San Pra ai Masha hku nna masat dang dat let, shi a poi nhtoi hpe mung July shata praw (2) ya ngu nna masat shagrau dat ya sai rai nga ai.

Daini Nawku Hpung gaw, San Pra ai Wa Jau Bernerdino a Poi Nhtoi hpe galaw nga ai aten hta, anhte a sak prat hkrun lam hta mung, kadun la ai aten hta, Wa Jau Bernerdino zawn, manu dan ai hte sak hkrung hkawm sa chye ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)