San Pra ai Wa Jau Bernadino Realino Poi Nhtoi (July 02)

San pra ai Bernadino gaw, Italy Mungdan, Capi mare hta, 1530 ning, December shata praw (1) hta Lusu ai kanu kawa ni kaw nna shangai chying hkai wa ai rai nga ai. Kanu kaw na, Hkristian hpaji hpe sharin la nna, tsi hpaji hpe Bologna Dakkasu kaw sharin hkam la lai wa sai. Dai hpang tsi hpaji a malai hkansa ritkawp tara hpaji (Law) hpe galai sharin la nna 1563 ning hta tara Janmau gup la lu sai. Shi a tara hpaji atsam the bungli hta kangka ai myit jasat ni a majaw mying kaba wa nna Naples mare hta jahpan jep lit hte ningtau du up, Lieutenant General aya hpe dang da hkrum nu ai.

Hpang daw de, shi gaw Karai Kasang a magam gun na myit rawng wa ai: grau nna Nu Maria shi kaw sad an pru ai hpang kaw na, Jesuit Jau Wuhpung de shang na matu, 1567 ning hta myit hkut dawdan nu ai. Naples mare hta matsan masha ni hte ramma ni hpe yu gawn ai lit magam gun hpai let nga kau da let, shi a hpang jahtum (42) ning tup Italy Mungdan Lecce mare kaw magam gun hpai let nga lai wa sai.

San Pra ai Wa Jau Bernardino gaw, mara raw ya ai Jau ni a kasi “a model confessor” ning tawn ai mungga htawn ai wa, “Powerful preacher”, ramma ni hpe makam masham hte seng ai lam hta myit su myit kung ai ladat hte sharin shapan ya lu ai atsam rawng ai wa rai nga ai. Bai nna kangka ai wenyi sagurem wa tai nna, Lecce mare na Jusuit Jau ni a Dakkasu jawng up hte Jesuit Jau ni a ningbaw lit magam hpe mung gun hpai lai wa sai rai nga ai.

San Pra ai Wa Jau Bernerdino hpe shi a mare masha ni grai tsawra kam hpa lai wa ma ai. Ya na zawn, Wa Jau gaw, 1616 ning hta machyi kaba hkrum wa ai shaloi, dai Lecce mare na tara agyi ni gaw, ndai mare hpe galoi mung yu makawp maga ya na matu, Wa Jau hpe hpyi lajin lai wa masai. Wa Jau gaw, dai shaning July shata praw (2) ya shani, shi a asak (85) ning hta, Madu a lahpyen hta e yup pyaw ban sa mat wa sai rai nga ai.

Wa Jau n nga mat ai hpang, 1896 ning, January shata (12) ya shani, Wa Sarabyin Leo XIII kaw nna, San Peter pa kaba hta Alu ai masha dang dat ai.

1947 ning, June shata (22) ya shani gaw, Wa Sarabyin Pius XII kaw nna, San Peter Pa kaba hta sha San Pra ai masha hku nna masat dang dat let, shi a poi nhtoi hpe July shata praw (2) ya ngu masat dat sai hte maren daini na aten du hkra Nawku hpung gaw ding yang galaw taw sai rai nga ai.

By; Sister Rose Angeline Maran Nang Doi (SFX)

RVA-Kachin Service (Myitkyina, Kachin State)

Add new comment

11 + 8 =