San Pra ai Vincent Ferrer a Poi Nhtoi (April 5)

San Pra ai Vincent Ferrer gaw, lai wa sai 1350 ning, January shata (23) ya shani hta Spain mungdan kaw na, Valencia ngu ai mare kaw shangai chyinghkai wa ai rai nga ai. Shi gaw, Dominican ngu ai magam gun wuhpung kaw na tara mungga hkaw ai hte ning tawn ai ni a jahpan ni hta malawm langai mi rai nga ai. Kanu yan Kawa a sharin achyin ya ai a marang e, matsan mayan re ai masha ni hpe tsawra chye ai, Bat (3) ya hte (6) ya shani hta lusha gam ai, Madu Yesu hte Nu Maria hpe alak mi rai tsawra hkungga chye ai wa mung rai nga ai.
Shi gaw, lai wa sai 1374 ning hta, Domican magam gun wuhpung de shang nna tara mungga hkaw ai lam hta grai ning tawn ai hte shi a hkaw matsun ai lam ni gaw, shara shagu hta grai awng dang wa ai. Jau Vincent gaw, Manang Ju ni hpe “Tara hkaw ai shaloi masha chye madat ai ga si ni hte hkaw ga, ra kadawn ai, tang du nna sakse sakgan ni hte hkaw dan ga, nang hkaw ai mungga hpe madat nga shajang ai ni kaw hkra nan hkra ran a, shanhte hkum gu hpe matsun shadum nga ai zawn nga nna hkawm sha lu hkra atsam shapraw nna hkaw ra ai” nga nna hpaji jaw shadum ya ya re ai. Dai majaw, shi gaw manang Jau ni kaw nna garum grai lu wa ai.
Dai hta n-ga, Jau ni hpe shi gaw ndai zawn shadum ai; “Nang mara raw ya ai nga ai shaloi, galoi mung tsawra matsan dum myit madun ya ra ai hpe dum u. Myit n daw dan lu ai, un gang nga ai wa hpe hpaji jaw, n gun jaw nga ai rai rai, nah tat ai wa Karai Kasang hpe hkrit myit rawng wa na matu shagwi ai mi rai rai, mara raw ai wa gaw, nang shi hpe tsawra myit hte tsun shadum nga ai hpe chye na wa na matu ahkyak ai.” nga nna shadum yay a rai wu ai.
San Pa ai Jau Vincent Ferrer gaw, 1419 ning, April shata (5) ya shani hta, Francis mungdan, Vannes mare kaw tara hkaw nga yang, Madu kaw yup pyaw ban sa mat wa sai rai nga ai.
Shi n nga mat ai hpang, 1455 ning, June shata praw (3) ya shani hta, dai aten na, Wa Sarabyin Callixtus (III) kawn, San Pra ai masha dang dat let, shi a Poi Nhtoi hpe mung, April shata (5) ya shani ngu masat shagrau dat sai rai nga ai.
Daini Nawku Hpung gaw, San Pa ai Jau Vincent Ferrer a Poi Nhtoi hpe galaw nga ai hte maren, anhte a Prat hta mung, Karai Kasang Wa myit ra sharawng ai magam bungli ni hpe tinang a asak aprat htum ai aten du hkra, sadi dung kang ka let galaw shakut lu ai ni, tinang a manaw manang, makin jinghku, dum nta masha ni hpe shawang tsawra myit galoi mung chye madun lu ai ni byin tai lu hkra shakut nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)