San Pra ai Vincent de Paul a Poi Nhtoi (September 27) 27 September 2022

San Pra ai Vincent de Paul a Poi Nhtoi (September 27)

San Pra ai Vincent de Paul hpe “Matsan Dum Lama ai Magam Gun ni Kam Shamyet ai Wa” nga nna masat shagrau ai rai nga ai. Shi gaw, Fransik Mungdan, Pouy Mare kaw lai wa sai 1581 ning, April shata (24) ya shani hta matsan mayan re ai Kanu yan Kawa kawn shangai chyinghkai wa ai rai nga ai.

Vincent de Paul Shi a asak (20) ning hta Toulose Dakkasu kaw na laika hpaji sharin hkaja la ngut ai hpang Jau tai wa sai rai nga ai. Nnan daw hta e, shi gaw, Paris mare na Lusu ai kun dinghku ni hpe matsun sharin ai magam lit hpe apyaw angawn sha gun hpai lai wa ai. 1617 ning a lani mi hta shi gaw, machyi nga ai yi sun hkauna galaw sha ai masha langai mi hpe mara raw ya ai. Dai wa mara raw ai kaw nna Fransik Mung na yi sun hkau na galaw sha ai ni a matsan mayan re ai wenyi mang hkang lam ni hpe chye la lu nu ai.

Dai aten kaw nna shi gaw, matsan masha ni hpe shawng lam tawn nna yu gawn na hte, Jau ni hpe mung lam woi hkrang shapraw jaw ya ai hku nna shaman shalat ya na matu shi a asak ap jaw kau na, nga nna myit daw dan kau nu ai. Dai shaning, shi gaw Paris mare kaw na pru mat nhtawm, grai tsan, grai yak ai shara kaw na Chatillon-les-Dombes mying ai kahtawng kaw ginwang up Jau sa tai mat ai.

1626 ning hta, Jau Vincent de Paul gaw, “Sasana Magam Gun Wuhpung” (Congregation of the Mission) hpe gaw de hpang dat sai. Dai Wuhpung gaw, Sasana magam hte Jau tai jawng hte seng ai lit ni hpe madung tawn galaw sa wa na matu yaw shada let gaw de hpang da tai rai nga ai. Jau ginwang na matsan masha ni a Wenyi lam hte seng nna Confraternities of Charity “Matsan Dum Lama Wuhpung” ni hpe mung de hpang ya sai. Dai bungli awng dang na matu, Paris mare kaw na, “Matsan Dum Chye ai Nu Num ni” ngu nna shamyit ai Lusu ai amyu shayi ni kaw nna garum hpyi la wu ai.

1633 ning hta, San Pra ai Louis de Marillac garum ai majaw, Jau Vincent de Paul gaw, Sisters of Charity “Matsan Dum Mama Wuhpung” mying ai sasana magam gun wuhpung hpe mung hpaw da ya lu sai rai nga ai. Dai wuhpung shang ni hpe Jau Vincent gaw; “Anhte gaw, lam shagu hta matsan masha ni hpe shawng galaw daw mayu ai myit rawng ra ai. Nanhte akyu hpyi nga ai aten hta masha langai ngai tsi mawan shing n rai kaga ra kadawn ai lam lama ma sa hpyi yang, myit sim myit sa dai wa hpe galaw ya dat u. Ndai nanhte galaw ya dat ai ta tut magam bungli hpe akyu hpyi ai a malai, Karai Kasang hpe ap kau mu.” nga nna ding yang shadum ya ya re ai.

Jau Vincent gaw, shut dik ai masa rai nga ai “Karai Kasang a matsan dum myit hpe kam hpa na malai, Karai Kasang a ari dan hpe hkrit ra ai” nga nna sharin ya ai Jansen a shut shai tara a majaw, shawa masha ni a matu, grai myit tsang ya lai wa sai.

San Pra ai Jau Vincent de Paul gaw, 1660 ning, September shata (23) ya shani hta, Fransik mungdan, Paris mare kaw, Madu hta yup pyaw ban sa wa mat wa sai rai nga ai.

Jau Vincent de Paul n nga mat ai hpang, 1729 ning, August shata (13) ya shani, dai aten na Wa Sarabyin Benedict (13) kawn, shi hpe A Lu ai Masha ngu masat shagrau dat ya sai rai nga ai.

Dai hpang, 1737 ning, June shata (26) ya shani gaw, dai aten na Wa Sarabyin Clement (12) kawn, Shi hpe San Pra ai Masha dang dat let, Shi a Poi Nhtoi hpe mung, September shata (27) ya shani masat shagrau dat ya sai rai nga ai.

Daini, Nawku hpung kaw nna, San Pra ai Jau Vincent de Paul a Poi Nhtoi hpe myit dum galaw nga ai aten, anhte hpung masha ni mung, Jau Vincent de Paul zawn, anhte a prat hta tinang a makau grup yin hkan na, matsan mayan jam jau hkrum nga ai hpunau ni hpe dang lu ai daram garum pawn ba la lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)