San Pra ai Victor a Poi Nhtoi (February 26)

San Pra ai Victor gaw, tsaban (6) hta Fransik mungdan na, Troyes mare kaw shangai chyinghkai wa ai rai nga ai. Shi gaw, Akyu hpyi shaja ai, lusha gam ai, matsan masha ni hpe yu gawn nna hpu nau tsawra myit hpe madung tawn let sak hkrung nga lai wa sai.

Ma kaji ten kaw nna, shi gaw matsan mayan re ai ni hpe alak mi rai garum chye ai myit jasat rawng nga ai. Shi a sanpra ai sat lawat hte gam garan jaw ai myit masa ni a majaw, shi tara shadik nga ai Tawra jawng de masha law law sa du ma ai. Shi a mai kaja ai kasi ningli ni gaw, Hkristan ni chyu sha n rai, Hkristan n re ai ni mung grai hkan shatup let, Nawku hpung de gale shang wa ma ai. Nkau mi gaw, shi zawn sha, masha hpawng hte tsan gang ai shara hkan azim sha tara shadik shakut let nga ma ai.

San Pra ai Saradaw Victor, n nga mat ai hpang shi a ngam nga ai hkum tsawp hpe Monteramey shara kaw na Benedictine Tawra Jau Jawng de la wa ma ai. Dai shara e, daini du hkra Tawra Jau ni gaw shi a Poi galaw nna shakawn shagrau ya nga ma ai. Cistersian Jau magam gun wuhpung kaw nna Clairvatix ngu ai shara na, San Pra ai hpaji ninghkring Bernard ka shapraw kau da ai mahkawn hte labau a majaw, San Pra ai Victor gaw, Nawku hpung hta myit kaba ai wa rai nga ai.

Nawku hpung kawn nna mung, shi hpe San Pra ai Masha dang dat let, Shi a Poi Nhtoi hpe February shata (26) ya shani ding yang galaw ya taw ai rai nga ai. Daini San Pra ai Saradaw Victor a Poi Nhtoi hpe galaw nga ai aten, anhte hpung masha ni mung, tinang a makau grup yin a matu, ning htoi kaja tai, kasi kamang kaja madun lu ai ni byin tai lu hkra, ra nga ai akyu chyeju ni hpe hpyi la nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)