San Pra ai Veronica a Poi Nhtoi (February 4) 04 February 2021

San Pra ai Veronica a Poi Nhtoi (February 4)

San Pra ai Veronica hpe Madu Yesu a nni nkri yubak hkrun lam hta tsawra matsan dum myit adan aleng rai madun ai majaw, alak mi nan myit dum hkungga shakawn nga ga ai re. Shi gaw, Kalwari Kawng ntsa kaw du hkra Madu Yesu a hpang hkan nang nna, Madu Yesu hpe myiman katsut la na matu sumpan jaw ya ai. Madu Yesu gaw, chyeju dum kabu ai sakse tai na matu dai sumpan kaw shi a myiman hpe dem shakap dat ya sai rai nga ai.

Veronica gaw, Yerusalem mare kaw na amyu shayi langai mi rai nga ai. Shi a lam Chyum Laika hta law law lang wa mu hti lu nga ga ai re. Sai hkaw ana hkam sha nna, Madu Yesu e shamai kau ya hkrum ai num, Madu Yesu a myiman dem shakap la lu ai Veronica a Sumpan a majaw, hkawhkam Tiberius hkam sha nga ai machyi makaw kaw nna mai tsai mat ai lam, ndai sumpan hte seng ai lamik kumla law law a lam hpe mung mu lu nga ai. Madu Yesu a myiman sumla kap ai Veronica a Sumpan hpe Sarabyin Clement hte shi a hkang galai ai Sarabyin ni langai hpang langai mazing hkrat wa ma ai.

Veronica gaw, Makam masham de gale shang wa ai hpang Zahke-u hte Fransik mungdan kaw dinghku de sai rai nga ai. Shan gaw, Roma mare de akyu hpyi hkrun lam pru sa wa ai shaloi, Madu Wa Zahke-u hpe Rocamadour shara kaw tawra shatai kau da nhtawm, Nu Maria a nrut nra ni hpe Soulac mare de la wa ai lam, Soulac mare kaw nsa hti mat ai hpe labau hta mu lu nga ai.

Masha law law gaw, shi zawn ndai mungkan ntsa asak naw hkrung nga ai aten kaw nna, htawm hpang na prat hta sumsing ja mungdan kaw ngwi pyaw simsa ai hte ningngai nga lu na shaman chyeju lu la u ga matu, San Pra ai Veronica hpang de garum akyu hpyi la nga ma ai re.

Nawku hpung kaw nna mung, shaning shagu San Pra ai Veronica a Poi Nhtoi hpe galaw ya nga ai gaw, daini na aten du hkra rai nga ai. Dai majaw, anhte hpung masha ni mung, daini San Pra ai Veronica Poi Nhtoi Shani hta anhte hta ra nga ai shaman chyeju ni hpe lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)