San Pra ai Veronica Guiliani a Poi Nhtoi (July 9)

San Pra ai Veronica Guiliani gaw, Italy Mungdan, Mercatello Ginwang, Urbino Mare hta e, lai wa sai 1660 ning, December shata (27) ya shani shangai chyinghkai wa ai rai nga ai. Veronica gaw, Ma kaji aten kaw na, grai sumnung ai hte makam masham grai rawng ai num kasha mung rai nga ai.

Shi asak ram wa ai shaloi, Kawa gaw, Veronica hpe dinghku de shangun mayu ai majaw, machyi mat hkrat rai Veronica myit n pyaw mat wu ai. Dai hpe kawa chye yu nna, asak (17) ning hta kawa gaw, Umbria mare, Citta di Castello shara kaw na Capuchin Tawra Jau ni yu gaw nga ai Poor Clares Mama Wuhpung de shang na ahkang kabu gara jaw yaw u ai. Veronica mung, prat tup dai jawng kaw tara shadik let sak hkrung nga lai wa sai rai nga ai.

Mama ga sadi tawn ngut ai hpang lani mi na ten hta, Veronica gaw, Madu Yesu Wudang hpai ai hpe shingran mu nna shi a salum hta makret machyi ai hkam sha wa ai. Bai nna, Madu Yesu a nni nkri yubak hkam sha ai gawm Veronica hpe sa jaw ai shaingran hpe mung mu ai. Gawm dai hpe shi hkap la ai hte rau shi a wenyi hte hkum ting hta Yesu a nma hkang ni kap wa ai. Dai mabyin gaw, 1693 ning hta byin lai wa ai rai nga ai. 1697 ning na Chyoi Pra ai Manga Ya shani Madu Yesu a Nma Hkang Manga Veronica a hkum kaw bai kap wa ai.

Mama Veronica gaw, shi yu gawn ai Mama tai na numsha ni hpe shagrit shanem ai myit, madat mara ai myit, hpunau tsawra myit law htam jat wa na matu alak mi rai nna sharin ya let, kasi kamang madun ya sai. Shi gaw, dai jawng na Mama Kaba lit hpe shi a ngam ai (11) ning tup gun hpai lai wa ai hpang, 1727 ning, July shata (9) ya shani, Madu Kaw yup pyaw ban sa mat wa sai rai nga ai.

Mama Veronica gaw, shi a magam gun mahkrum madup ni hpe, “Madu Yesu Hkam ai Nni Nkri hte Seng ai Matsing Laika” (Diary of the Passion) ngu ai laika buk kaw da kau da nga ai.  

San Pra ai Veronica Guiliani n nga mat ai hpang, 1804 ning, June Shata (17) ya shani hta, dai aten na Wa Sarabyin Pius (VII) kawn Shi hpe A Lu ai masha masat shagra dat ya sai rai nga ai.

Dai hpang, 1839 ning, May shata (26) ya shani hta gaw, dai aten na, Wa Sarabyin Gregory (XVI) kawn, Shi hpe San Pra ai masha dang dat nna, Shi a Poi Nhtoi hpe mung, July shata (9) ya shani masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)