San Pra ai Tutilo a Poi Nhtoi (March 28) 28 March 2023

San Pra ai Tutilo a Poi Nhtoi (March 28)

San Pra ai Tutilo gaw, atsam marai law law hte seng ai shaman chyeju lu ai wa mung rai nga ai. Shi gaw, yu ngwi mahkawn hpe grai ra sharawng ai; madum sumpyi hpa law law chye dum wu ai. Shi gaw, Misa Hkungga Nawng Jau ai shaloi mahkawn ai, Alleluia Mahkawn hte seng ai gay an law law ka shalat kau da ai. Shi gaw, Hpaji machye machyang lam hta grai chye lawan loi ai, ga mung grai chye shaga ai. Shi gaw, Ga shaga byin ai wa (Orator), Ga Shagawp chye ka ai (Poet), Sumla Hkrangpan Soi ai wa (Painter), Jang Nai Hpaji Chye ai wa (Sculptor), Jak bungli chye ai wa (Mechanic), Hpri hte seng ai bungli chye ai wa (Metal Worker) rai nga ai.

Shi gaw, Switzerland mung na, Benedictine Tawra Jau ni a Saint-Gall jawng kaw hpaji sharin nna ngai kaba wa ai. Hpang de Tawra Jau tai wa nna, shanhte a laika sharin jawng kaw jawng up Jau kaba tai wa sai.

Shi gaw, hpaji madup sumhpa chye ai wa raitimung, asim sha rai tara shatup nna nga na hpe ra sharawng ai. Hkawhkam Charles gaw, shi hpe shinggan masha hpawng kaw shi a hpaji atsam madun shangun na matu n gun jaw lai wa ai. Raitimung, shi gaw, masha hpawng hpe mai byin ai made koi let, tara shakut nna sak hkrung nga lai wa ai.

San Pra ai Tutilo soi da ai Sumla law law hpe daini na ten du hkra, myit kaba ai madun gawknu (Library – Mesum) hkan madun tawn ai hpe mu lu nga ai. Ga Shadawn; Germany Mungdan na Constance hte Mainz mare, Fransik Mung na, Metz mare, Switzerland mung na, Saint-Gall mare na mying dan hkung ai madun gawknu ni hkan madun da nga ma ai re.

San Pra ai Tutilo gaw, A.D (915) ning mayan hta n nga mat wa sai rai nga ai. Shi hpe San Pra ai Catherine Nawku Jawng kata kaw makoi mayang da ma ai. Ya ten hta, dai Nawku Jawng hpe San Pra ai Tutilo hpe shagrau ai hku nna, San Pra ai Tutilo masat dingsat nawku jawng nga nna galai shamying da nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, March shata (28) ya shani ngu masat shagrau dat ya sai rai nga ai.

Daini Nawku hpung gaw, San Pra ai Tutilo a Poi Nhtoi hpe galaw nga ga ai aten hta, anhte a sak prat hkrun lam hta mung, kaning re ai sak prat hkrun lam hta raitim, Madu a shaga la ai nsen hpe na ai hte rau Madu a myit ra ai hku nna hkawmsa lu hkra, shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Video Link: https://www.youtube.com/watch?v=3yId0zJLFqs