San Pra ai Timothy hte Titus Yan a Poi Nhtoi (January 26) 26 January 2023

San Pra ai Timothy hte Titus Yan a Poi Nhtoi (January 26)

San Pra ai Timothy gaw, Kasa Pawlu a Hpung Magam gun manang langai mi rai nga ai. Shi gaw, Lyconia ginwang, Lystra mare kaw shangai chyinghkai wa ai rai nga ai. Shi a Kawa gaw, tara maigan masha rai nna, Kanu gaw Yuda hpung shang langai mi rai nga ai.

Shi hpe Kasa Pawlu gaw, matu gadoi ai lamang galaw ya ai hpang Hkristan Hpung Masha shatai ya sai. Kasa Pawlu gaw, Timothy hpang de hpu nau tsawra myit hte Macedoni a mungdan kaw na kalang mi, Roma mare kaw nna kalang mi, lahkawng lang laika shagun nna hpunau shada tsawra myit rawng ra ai lam hpe shadum ya lai wa sai. Timothy gaw, ladu shalai lusha shadawn sharam sha ai majaw kan ana lu wa ai; shi a kan ana hpe tsi shamai la na matu shi hpe tsabyi loi li man man lu na matu hpaji jaw dat ai.

San Pra ai Timothy gaw, Asia Minor ginwang Ehpesu mare na Saradaw lit shatsam ya ai hkrum wu ai. Dai mare hpe ginjaw shatai nna shi a sak hkrung ten tup nga lai wa sai. Hkawhkam Nerva up hkang nga ai A.D (97) ning hta, Timothy gaw tara maigan ni a hpara sumla naw ai lam hpe ning hkap let daru sharin ai majaw, tara maigan masha ni gaw, shi hpe nlung hte, hpun tawng hte jawm kabai sa kau ma ai.

Bai San Pra ai Titus gaw, Kasa Pawlu a chyare rai nga ai. Kasa Pawlu hkum nan shi hpe Hkristan makam amsham de woi shang wa ai. Shi hpe Kasa Pawlu gaw, grai tsawra let kam shamyet ai. Shi mung Kasa Pawlu a Hpung magam gun hkrun lam law law ni hta hkan nang lawm lai wa sai. A.D (49) ning hta Mawshe a hkan sa tara hte seng nna Nawku Hpung gaw Yerusalem mare kaw zuphpawng kaba galaw ai shaloi mung, Kasa Pawlu gaw, Titus hpe woi sa wu ai. Titus a kanu yan kawa gaw, tara maigan masha ni rai nga ma ai. Dai majaw, Titus hpe Pawlu gaw matu gadoi ai lam n galaw shangun ai. Kasa Pawlu gaw, Titus hpe Greek Mungdan, Crete mare kaw na Saradaw lit shatsam tang dat ya sai. San Pra ai Titus gaw, Crete mare kaw A.D (96) ning hta Makaw kaw yup pyaw ban sa mat wa sai rai nga ai.

San Pra ai Timothy hte Titus yan n nga mat ai hpang, Nawku Hpung gaw, shan lahkawng hpe San Pra ai masha dang dat let, shan a Poi Nhtoi hpe mung, shaning shagu January shata (26) ya shani galaw ya nga ai rai nga ai.

Daini Nawku hpung gaw, San Pra ai San Pra ai Timothy hte Titus a Poi Nhtoi hpe galaw nga ai aten, anhte a myit masin hta mung, tinang lu da sai makam masham hpe galoi mi raitim, nden ja ai myit hte sakse hkam nga lu ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)