San Pra ai Theotonius a Poi Nhtoi (February 18)

Saint Theotonius (February 18)

San Pra ai Theotonius gaw, matsan masha ni hte Nga-rai kaji “Purgatorium” kaw na wenyi ni hpe laksan tsawra matsan dum ai san pra ai masha rai nga ai. Dai lahkawng a matu yaw shada nna Bat Manga ya shagu Misa Hkungga kaba nawng ya ya rai wu ai. Shawa masha hte rau lupwa de akyu sa hpyi nhtawm misa nawng jau ai lam galaw ai. Shawa masha ni kaw na garum madi shadaw alu law law lu la nu ai. Dai alu ni hpe shi gaw, matsan masha ni hpe bai garan jaw ya wu ai.

San Pra ai Theotonius gaw, 1082 ning hta Spain Mungdan kaw shangai chyinghkai wa nna, Protugal Mungdan, Coimbra mare hta Jau tai Sacramentu hpe hkam la nu ai. Shi gaw, Tara hkaw matsun ai lam ni hta nden ja ja rai hkaw matsun chye ai. Ahkaw ahkang lu ai ni, mungkan a pyaw len masa hte n shawp ai hku nna ngai lai wa ai ni hte seng nna dan dawk hkra ai ga hkaw ni hte n hkrit n tsang ai sha hkaw tsun shadum chye nga ai. Ndai zawn ga si n lata nga ai sha, ra ai hpe ra ai ga si hte nan hkaw tsun timung, shi a hkawhkam hte hkawhkam jan gaw, shi hpe grai tsawra hkungga nga ma ai.

Chyoi Pra ai Buga (Holy Land) de sa du gawan ai hpang, Coimbra mare kaw na Canon Regulars of St. Augustine “San Pra ai Tawra Jau Augustine” a jawng de madaw shang mat wa ai. Dai jawng kaw shi gaw, san seng san pra ai lam a kasi kamang tai wa sai. Shi hte rau shani shagu akyu jawm hpyi ai Tawra Jau ni gaw, shi a kasi hpe mu lu nna grai hkungga ya ma ai.

Ndai Tawra Jau jawng kaw (30) ning tup lit magam gun hpai ngut ai hpang, 1166 ning, February shata (18) ya shani, shi a asak (80) ning du ai shaloi, Madu hta yup pyaw bansa mat wa sai rai nga ai.

Shi n nga mat ai hpang, Nawku Hpung gaw, shi hpe San Pra ai masha dang dat nna, shi a Poi Nhtoi hpe mung, February shata (18) ya shani ding yang masat shagrau ya nga ai rai nga ai.

Daini Nawku hpung gaw, San Pra ai Theotonius a Poi Nhtoi hpe masat shagrau ya nga ai nhtoi shani hta anhte a prat hta tinang a manaw hte makin jinghku ni hpe tengman ai lam hta tsun shadum ai lam ni hta gwi gwi tsun shadum lu na atsam lu la u matu, lak san akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

2 + 3 =