San Pra ai Theophanes a Poi Nhtoi (March 12)

San Pra ai Theophanes gaw, lai wa sai tsa ban (6) daram hta, Greece Mungdan, Samothrace mare kaw shangai chyinghkai wa ai rai nga ai. Shi a kanu yan kawa gaw, lusu ai masha kaba ni rai ma ai. Shi gaw, dinghku la raitimung, shi a madu jan Mama jawng kaw tara shakut na ahkang hpyi ai shaloi, shi ahkang jaw dat sai. Shi mung, hkawhkam Costantine (V) a hkawhkam hkaw hta bungli gunhpai nga ai kaw nna pru wa let, asim sha tara sa shatup nna nga mat ai.

Shi gaw, asim sha tara shatup nna nga mayu ai raitimung, Jau jawng lahkawng woi hpaw ra nna shi yaw shada tawn ai hte maren n byin wa ai. Dai sha n ga, Mount Sigriana ngu ai Kawng kaw galaw tawn ai Jau jawng kaw jau kaba lit gun hpai let, hpaji tam shakut nna mungkang labau ka da sai rai nga ai.

Ndai zawn rai nna, Maumwi mausa ka lajang nga ai aten hta sanpra ai sumla ni hpe jahpoi asawng ai “Iconoclast” ngu ai shut shai ai sharin shaga ai nip raw pru wa ai hte Leo the Armenian a zingri shatsang ya ai manghkang byin wa ai majaw, shi a labau ka ai amu matut nna n mai galaw mat nu ai.

San Pra ai Jau Theophanes gaw, Hkristan Makam Masham hpe sadi dung let sak hkrung nga lai wa sai. Dai zawn rai nna, Shi a prat hta makam masham hpe madung tawn nna sak hkrung lai wa sai majaw, hpa hpe mung n hkring n tsang ai wu ai.

Dai zawn shakut hkawmsa nga ai ten, htawng sharawng da ai hpe hkrum nu ai. Dai hpang, dai shara kaw na gawt shapraw kau hkrum ai, hpang jahtum shi gaw zingri shatsang hkrum nna, A.D 817 ning, March shata (12) ya shani, asak sum lai mat wa sai rai nga ai.

Shi n nga mat ai hpang, Nawku Hpung gaw, shi hpe e, San Pra ai Masha dang dat let, Shi a Poi Nhtoi hpe mung, March shata (12) ya shani masat shagrau dat ya sai rai nga ai.

Daini San Pra ai Theophanes a Poi Nhtoi hpe galaw nga ga ai hte maren, anhte a prat hta mung, kaning re ai prat hta raitim, Madu Karai Kasang Wa a shaga la ai n sen hpe na lu hkra shakut let, Shi Madu ra sharawng ai hku nna, sak hkrung hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)