San Pra ai Solomon Le Clerg a Poi Nhtoi (September 2) 02 Sept 2023

San Pra ai Solomon Le Clerg a Poi Nhtoi (September 2)

San Pra ai Solomon le Clerg gaw, Francis Mungdan, Boulogne mare kaw, 1745 ning, November shata praw (14) ya shani shangai chyinghkai wa ai rai nga ai. Kanu yan Kawa gaw, tsabyi chyaru hpaga lauban ni rai ma ai. Shi gaw, Kaji ten hta Kawa a bungli kaw garum ya lai wa ai. Asak ram wa ai shaloi, Karai Kasang a shaga ai nsen na lu nna, Hpung Magam gun tai wa nu ai.

Shi gaw, Hkristian Hpaji Jawng hte seng ai Brother “Brothers of Christian Schools” ni a shalat shaman shakyang ai Novitiate hpe, St.Von kaw na shaman la ngut ai shaloi, Shi a mying hpe Solomon nga nna shamying la ai. Laika sharin ai Brother prat hta shi hpe shanhte Brother Wuhpung jawng law law de bungli galaw shangun ma ai. Dai aten kaw nna, shi gaw akyu hpyi shaja ai hte jawngma ni hpe kasi kaja madun ai majaw, jawngma ni shi hpe grai hkugga tsawra ma ai.

Brother Solomon gaw, lit hpan shagu gun hpai shangun timung, Hpung magam gun majing tai nna gun hpai ai; Novice ni hpe yu gawn ai Director, ginjaw gumhpraw jahpan jum, wuhpung ningbaw (Superior General), hte amu madu lit ni hpe shatsam hkrum ai hte maren atsam sha gun hpai lai wa sai.

Francis rawt malan, “French Revolution” aten hta brother ga sadi hte Kahtawlik makam masham hpe sadi dung ai hte nden ja ja rai hkan shatup lai wa ai. Kade mi yak hkak jam jau hkrum wa timung, myit masin lak nak n jahkrat ai. 1792 ning, September shata praw (2) ya shani hta Paris mare na, Camelite Mama jawng wang sun kata e, Brother Solomon hte shi a manang ni gaw, sat shamyit kau ai hpe hkrum lai wa masai.

Brother Solomon n nga mai hpang, 1926 ning, October shata (17) ya shani hta, Brother Solomon hpe, dai aten na, Wa Sarabyin Pius (11) kawn, Shi hpe A Lu ai Masha hku nna shagrau masat dat sai rai nga ai.

Dai hpang, 2016 ning, October shata (16) ya shani gaw, ya na, Wa Sarabyin Francis kawn Brother Solomon hpe, San Pra ai Masha hku nna dang dat let, Shi a Poi Nhtoi hpe mung, September shata Praw (2) ya shani masat dat ya sai rai nga ai.

Daini Nawku Hpung gaw, San Pra ai Brother Solomon a poi nhtoi hpe galaw nga ga ai aten hta, anhte hpung masha ni mung, Brother zawn tinang chye da ai machye machyang ni hpe kaga masha ni matu, akyu rawng ai hte daw jau ya lu ai ni, byin tai lu hkra shakut nga ga law.  

By;

Sister Rose Angeline Maran Nang Doi (SFX)

RVA-Kachin Service (Myityina)