San Pra ai Solomon Le Clerg a Poi Nhtoi (September 2)

San Pra ai Solomon le Clerg gaw, Francis Mungdan, Boulogne mare kaw, 1745 ning, November shata praw (14) ya shani shangai chyinghkai wa ai rai nga ai. Kanu yan Kawa gaw, tsabyi chyaru hpaga lauban ni rai ma ai. Kaji ten hta Kawa a bungli kaw garum y alai wa ai. Asak ram wa ai shaloi, Karai Kasang a shaga ai nsen na lu nna, Hpung Magam gun tai wa nu ai.

Shi gaw, Hkristian Hpaji Jawng hte seng ai Brother “Brothers of Christian Schools” ni a shalat shaman shakyang ai Novitiate hpe, St.Von kaw na shaman la ngut ai shaloi, Shi a mying hpe Solomon nga nna shamying la ai. Laika sharin ai Brother prat hta shi hpe shanhte Brother Wuhpung jawng law law de bungli galaw shangun ma ai. Dai aten kaw nna, shi gaw akyu hpyi shaja ai hte jawngma ni hpe kasi kaja madun ai majaw, jawngma ni shai hpe grai hkugga tsawra ma ai.

Brother Solomon gaw, lit hpan shagu gun hpai shangun timung, Hpung magam gun majing tai nna gun hpai ai; Novice ni hpe yu gawn ai Director, ginjaw gumhpraw jahpan jum hte wuhpung ningbaw, Superior General amu madu lit shatsam hkrum lai wa ai.

Francis rawt malan, “French Revolution” aten hta brother ga sadi hte Kahtawlik makam masham hpe sadi dung ai hte nden ja ja rai hkan shatup lai wa ai. Kade ayak ahkak hkrum wa timung, myit masin lak nak n jahkrat ai. 1792 ning, September shata praw (2) ya shani hta Paris mare na, Camelite Mama jawng wang sun kata e, Brother Solomon hte shi a manang ni gaw, sat shamyit kau hkrum lai wa sai.

Brother Solomon n nga mai hpang, 1926 ning, October shata (17) ya shani hta, Brother Solomon hpe, dai aten na, Wa Sarabyin Pius (XI) gaw, Al u ai masha hku nna shagrau masat dat sai rai nga ai.

Dai hpang, 2016 ning, October shata (16) ya shani gaw, Brother Solomon hpe, Wa Sarabyin Francis kawn San Pra ai Masha hku nna dang dat let, Shi a Poi Nhtoi hpe mung, September shata Praw (2) ngu masat dat ya sai rai nga ai.

Dai majaw, daini San Pra ai Brother Solomon a poi nhtoi hpe Nawku hpung kawn myit dum galaw ya ai shani hta, anhte hpung masha ni mung, Brother zawn tinang chye da ai machye machyang ni hpe kaga masha ni hpe gam garan jaw lu ai atsam hpe jaw ya u ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myityina)