San Pra ai Simeon Stylite Kaji a Poi Nhtoi (May 24) 24 May 2022

San Pra ai Simeon Stylite Kaji a Poi Nhtoi (May 24)

 

San Pra ai Simeon gaw, san seng san pra lam hte asim sha nga ai myit jasat hpe alak mi rai nna hkan galaw let ngai lai wa ai, San Pra ai masha rai nga ai. Shi gaw, Yawhan mying ai Tawra Jau langai mi, yu gawn da ai jawng kaw lak san ladat shaw nna tara shadik nga ai; wut shadaw zawn re ai hpe pung hkum shatai nna dai ntsa kaw tara shadik nga ai ladat galaw nna nga wu ai.

Shi gaw, A.D 521 ning hta Turkey Mungdan, Antioch Mare kaw shangai chying hkai wa ai rai nga ai. Shi a asak (5) ning hta chyinghkai kawa si mat ai. Dai hpang shi gaw, makau mayang na Bum Ga de sa nga mat ai. Jau Yawhan kawn shi hpe yu gawn ya ai kata kaw nga kaba wa sai. Jau Yawhan hte Simeon yan gaw, Stylites ngu ai wut punghkum ntsa kaw tara shadik nga ma ai.

San Pra ai Simeon gaw, akyu hpyi shaja ai hte asim sha ndan ndawng ai sha tara shadik nna wenyi lam hta grai galu kaba jat wa ai. Shi a asak (20) ning du ai shaloi, masha ni n du lu ai Bum Ntsa kaw sa nga nna tara shadik taw nu ai. Dai shara gaw, shi a myit hta grai simsa ai shara mung rai nga ai.

Dai hpang (10) ning na ai shaloi, dai shara kaw Tawra Jau jawng langai mi gap nna tara shadik na matu wut punghkum shadaw galaw let shi a ngam nga ai sak hkrung ten (45) ning tup dai kaw tara shadik let nga kau da sai rai nga ai. Asak (30) ning du ai shaloi, Saradaw gaw, shi a wut punghkum ntsa lung nhtawm, shi hpe Jau shatai Sacremtu hkam ya sai. San Pra ai Jau Simeon gaw, dai Wut Punghkum shadaw ntsa kaw na, Missa Hkungga nawng jau ya ai majaw, shi a manang tawra ni gaw, lakang galaw n htawm dai wut punghkum ntsa de lung let Chyoi Pra Hkum hpe hkam la la rai ma ai.

 San Pra ai Jau Simeon gaw, A.D 597 ning, May shata (24) ya shani, Madu hta yup pyaw ban sa mat wa sai rai nga ai. Shi gaw, Mauhpa lamik kumla ni law law mung madun lai wa sai rai nga ai.

Shi n nga mat ai hpang, Nawku hpung gaw, shi hpe San Pra ai masha dang dat let, Shi a Poi Nhtoi hpe mung, May shata (24) ya shani, masat shagrau dat ya sai rai nga ai.

Daini Nawku Hpung gaw, San Pra ai Simeon Stylite Kaji a Poi Nhtoi hpe galaw nga ga ai aten hta, anhte Hpung Masha ni mung, Wa Jau Simeon zawn, anhte a prat hta myit hkyi lit li myit ru myit tsang lam ni kade nga wa tim, myit hpe azim sha nga let, Karai Kasang Wa hte ga shaga na aten, akyu hpyi na aten lu la hkra shakut sa wa  nga ga law.

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

7 + 0 =