San Pra ai Sebastian a Poi Nhtoi (January 20)

San Pra ai Sebastian gaw, Ginsup ning hkring ni a alak mi rai nna kam shamyet mai ai San Pra ai Masha rai nga ai. Shi gaw, Fransik Mungdan, Narbonne mare kaw shangai chyinghkai wa ai rai nga ai rai nhtawm, Italy Mungdan, Milan mare hta e laika hpaji sharin la lai wa ai rai nga ai.

Hkawhkam Carinus a lakhtak, A.D 238 ning hta, makam masham a majaw, sak hkrum na ni hpe labyin nna garum jaw na matu hpyen dap de shang mat wa nu ai. Shi gaw, nde ja magrau grang ai masha rai nga ai majaw, hkawhkam wa gaw, shi hpe hkawhkam hkawn sin ai dap kaw dabang up du shatai ya nu ai. Hkawhkam Deoclesianus a Sinpraw dan de garan hkawm ai aten hta ningtau hkawhkam Meximian gaw. Sebastian hpe grai kamhpa lai wa sai.

San Pra ai Sebastian gaw, shi a makam masham hte seng nna, kadai hpe mung n chye shangun ai. Raitimung, A.D 285 ning hta gaw shi a makam masham hte seng nna lagyim sagawn ai hkrum nu ai.

Sebastian gaw, Hkristian makam masham hkap la ai lam hkawhkam chye mat wa nna, Sebastian hpe ndan pala hte gap sat na matu matsun ya hkrum nu ai. Ndan Pala hte gap ai hpang Sebastian si sai shadu nna, shi a moi mang hpe dai shara kaw sha kabai kau da ma ai. Wunma hte si malu taw nga ai Sebasitan hpe San Pra ai Gaida Jan Irene tsi shamai la lai wa sai. Ndai zawn San Pra ai Irene tsi shamai la hkrum ai hpang shi gaw hkawhkam hpang de dan tawk sa wa ai; Hkristan Hpung Masha ni hpe n tra ai hku nna sat shamyit ai hkawhkam a myit jasat hpe n hkrit n tsang ai sha sat sun ai.

Shaloi Hkawhkam gaw, Sebastian hpe hpun tawng hte gayet sat shangun ai hpang hka hkawng kata kaw kabai bang kau shangun ai. Hka hkawng kata kaw taw nga ai Sebastian a Moi mang hpe tara shaku tai Lucina mying ai amyu shayi sha langai mi gaw, Appian lam makau e makoi mayang da wu ai. Ya ten e, dai shara kaw San Pra ai Sebastian hpe shagrau nna gaw gap tawn ai Nawku Htingnu Kaba hpe mu lu nga sai re.

Shi n nga mat ai hpang, Nawku Hpung gaw shi hpe Makam Masham a majaw sat kau hkrum ai San Pra ai Masha ngu dang dat let, shi a Poi Nhtoi hpe mung, January shata (20) ya shani hta masat shagrau dat ya sai rai nga ai.

Daini Nawku Hpung gaw, San Pra ai Sebastian a Poi Nhtoi hpe galaw nga ga ai shaloi, anhte a myit masin hta mung, Kam Sham myit ru jung nang kang wa lu na chyeju jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)