San Pra ai Sava a Poi Nhtoi (January 14)

San Pra ai Sava gaw, Serbia Mungdan kaw lai wa sai 1175 ning hta shangai chyinghkai wa ai rai nga ai.

Saradaw Sava gaw, ningbaw ningla tai ai kun dinghku kawn shangai chyinghkai wa ai rai nga ai. Shi gaw, Nemanydes hkawhkam htinggaw (Dynasty) hte Serbia mugndaw hpe da ai Hkawhkam Stephen (I) a kasha kaji rai nga ai.

1191 ning hta shi gaw, Athos Bum kaw nga ai Tawra Jau jawng de sat wa ai. Jau tai wai hpang 1219 ning hta Saradaw aya dang da ai hkrum nu ai. 1222 ning hta Serbia mungdan kaw na Saradaw Kaba lit shatsam ya hkrum sai. Shi gaw, Kawa hte maren mung shawa ni akyu hkam la lu na lam hta myit da ting nna galaw gun hpai lai wa sai rai nga ai. Shi gaw, Kawa hta grau nna, makam masham lam hte mung masa lam ni hta sharawng shara rai galaw ai majaw, awng dang ai lam lu la sai mung rai nga ai.

Shi a kasi kamang ni hte matsun maroi ga ni a majaw, shi a Jau ni mung matsan mayan ni hte masha ni n kaw n law di da hkrum ai, kabai da hkrum ai ni hpe makam masham lam sharin ya ai hta grai awng dang ma ai. Serbia amyu sha ni a makam amsham lam hpe bai shading sharai ya lu ai sha n-ga, Serbia amyu sha Saradaw ni mung, shabyin shatai ya lu sai rai nga ai. San Pra ai Saradaw Sava gaw, makam masham lam hte shawa bungli hpe kapyawn nna chye woi awn galaw ai.

Dai majaw, hkawhkam Stephen (II) uphkang ai aten hta Servia mungdan gaw grai zinlum ai mungdan byin tai wa sai. 1235 ning du hkra san seng san pra ai sat lawat, ap nawng ai myit jasat, kaja ai lam hte seng ai kasi ningli hte hkrak asak hkrung nga lai wa sai.

Ya na zawn, Karai a Magam lam hte matsan dum lama ai magam lam ni hta galaw shakut hkawm sa nga ai aten, 1236 ning, January shata (27) ya shani hta, Madu kaw yup pyaw ban sa mat wa sai rai nga ai.

San Pra ai Saradaw Sava n nga mat ai hpang, Nawku hpung gaw, shi hpe San Pra ai masha dang dat let, shi a Poi Nhtoi hpe mung January shata (14) ya shani galaw shagrau ya ai gaw, daini na aten du hkra rai nga ai.

Daini, San Pra ai Wa Saradaw Sava a Poi Nhtoi hpe Nawku Hpung galaw ya nga ai hte maren, anhte marai hkum shagu mung, tinang a man ang ai lit magam ni hpe atsawm sha galaw shakut hkawmsa lu na atsam jaw ya rit ga matu, akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyitkyina)

Add new comment

3 + 11 =