San Pra ai Saturninus hte Manang Ni a Poi Nhtoi (February 12) 12 February 2023

San Pra ai Saturninus hte Manang Ni a Poi Nhtoi (February 12)

          San Pra ai Saturninus gaw, Jau langai mi rai nga ai. Shi hte rau Hpung masha ni marai (48) gaw, Laban nawku lung nga ai aten rim hkrum ma ai. Shanhte lang ai Ja Chyum Laika ni hpe n hkru n kaja ai ni kashun timung n jaw ai majaw, A.D (304) ning hta rim kau hkrup ai rai nga ai.

Ndai mabyin ni gaw, A.D (304) ning hta mung up Dioclesian kawn Nawku Hpung hpe zingri sat ai shaloi byin mat wa sai rai nga ai. Hpung masha ni gaw, shanhte a makam masham hpe dan dan leng leng rai nna n hkan shatup lu ma ai. Raitimung, Jau Saturninus hte Hpung masha ni marai (48) gaw, Laban shani nawku zuphpawng galaw na matu, Africa mungdan, Abitina Mare kaw hpawng de nga ma ai. Hpyen la ni gaw, shanhte lang da ai Chyum Laika ni hpe hpyi ma ai shaloi n jaw ai majaw, shanhte hpe rim la nhtawm tara agyi Anulinus e jeyang ya na matu, Carthage mare de sa dat ma ai.

Shanhte gaw, makam masham a matu, htawng kata kaw n lu n sha ai sha nga ma ai. Shanhte kaw na nkau mi hpe gaw, hpang shani htau sat kau ma ai; ngam nga ai ni gaw, htawng kata kaw n lu n sha nga ai majaw, si mat shajang ma ai. San Pra ai Jau Saturninus hte dai Africa amyu sha ni a makam masham myit hta maju jung ai kasi gaw, kaga Hkristan hpung masha ni a matu, kasi la, n gun la shangun ai lam kaba tai wa sai rai nga ai.

Wa Jau hte hpung masha ni yawng hpe, Nawku hpung kaw nna Makam Masham a majaw sak kau hkrum ai tara sakse ni hku nna, shaning shagu February shata (12) ya shani masat shagrau shakawn ai gaw, daini du hkra rai nga sai re.

Daini Nawku hpung kawn, Makam masham a majaw, sak kau hkrum lai wa sai, San Pra ai Jau Saturninus hte Hpung masha ni a matu, myit dum akyu hpyi ya nga ai aten hta, anhte hpung masha ni a n tsa hta mung, ngang kang ai makam masham nli n kaja hpe jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)