San Pra ai Saradaw John Nepomucene Neumann a Poi Nhtoi (January 5)

San Pra ai John Nepomucene gaw, Chek (Czech) Mungdan, Bohemia mare kaw, lai wa sai 1811 ning, March Shata (28) ya shani hta, shangai chyinghkai wa ai rai nga ai.

Shi gaw, American Mungdan de, Sasana Amu Gun sa na matu, grai ra sharawng ai wa mung rai nga ai. Dai majaw, Jau tai jawngma sha naw rai nga ai aten kaw nna, shi hpe American Mungdan de sat awn da ma ai. 1836 ning hta shi gaw, Ne Your mare kaw Jau shatai Sacramentu hpe hkam la lu sai rai nga ai.

Jau John gaw, (4) ning tup Buffalo mare htawt shanu nga ai, German buhtawt ai masha ni hpe yu gawn ai lit hpe gun hpai lai wa ai. 1840 ning hta, shi gaw, tara hkaw ai magam hpe madung tawn ai Redemptorist Jau Wuhpung de shang mat wa nna, tara hkaw ai lit hpe madung bai galaw gun hpai wu ai.

Bai 1852 ning, February shata (5) ya shani hta gaw, Philadelphia mare na Saradaw lit shatsam ya hkrum wu ai. Saradaw tai wa sai hte mare, shi a Saradaw ginwang ting na hpung masha ni a wenyi lam hpe yu gawn ya ai hku nna, Jau ginwang ni hte Laika sharin jawng ni hpe gaw gap let, hpung gawan hkawm ai amu hpe da ting shakut shaja gun hpai lai wa sai.

Atsam marai dat nna galaw shakut hkawm ai hpang, shi a asak (49) ning, 1860 ning, January shata (5) ya shani hta, Wa Saradaw John gaw, Madu kaw yup pyaw ban sa mat wa sai rai nga ai.

Shi n nga mat ai hpang, 1963 ning, October shata (13) ya shani hta, dai aten na, Wa Sarabyin Pawlu (VI) gaw, shi hpe A lu ai masha ngu masat shagrau dat sai rai nga ai.

Dai hpang, 1977 ning hta, Wa Sarabyin Pawlu (VI) sha, San Pra ai masha dang dat let, shi a Poi Nhtoi hpe mung, January shata (5) ya ngu masat dat ya sai rai nga ai.

Daini Nawku Hpung gaw, San Pra ai Wa Saradaw John Nepomucene Neumann a Poi Nhtoi hpe galaw nga ai hte maren, anhte a myit hta mung, Karai Kasang Wa a shaga la ai nsen hpe na lu ai hte rau myit un gang ai lam n nga ai sha, shi a magam lit hpe gun hpai hkawmsa lu hkra lajang shajin nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)