San Pra ai Sarabyin Yawhan (I) a Poi Nhtoi (May 18)

Sarabyin Yawhan (I) gaw, Nawku Hpung a ningbaw lit gun ai aten hta Italy Mungdan hpe Hkawhkam Theodoric up hkang nga ai aten re. Hkawhkam Theodoric gaw, Arian a shut shai tara ni hpe hkap la ai wa raitim, Shi Hkawhkam tai wa ai nnan daw de Kahtawlik Nawku Hpung hpe jam jau n jaw ai. Byzantine “Constantinople” Hkawhkam hkaw kaw gaw, shawng lang na Kahtawlik Hkawhkam kaba Justin (I) aya dang da hkrum ai aten mung rai nga ai. Shi gaw, Arian a shut shai ai tara ni hpe laja lana tara shapraw nna ning hkap jasim kau wu ai.

Dai aten hta, San Pra ai Sarabyin Yawhan (I) gaw, Italy Mungdan Tuscany mare kaw shangai nna, Deacon sha naw rai nga ai aten A.D (523) ning hta Sarabyin lit shatsam ya hkrum nu ai. Shi gaw, Sarabyin Yawhan (I) amying hpe lata la wu ai. Sarabyin Yawhan (I) gaw, Italy Mungdan na Hkawhkam Theodoric a dat kasa tai nna Constantinople (Byzatine) na Kahtawlik Hkawhkam Justin (I) kaw sa du jahkrum wu ai. Dai aten hta, Italy mung dan up hkawhkam Theodoric gaw, shi hte hpung rum Arian hpung shang ni hpe makaw maga myit ja ja rai rawng nga ai.

Dat Kasa Sarabyin Yawhan (I) hpe Constantinople mare masha ni wu wu di di kabu gara rai nna hkap tau la ma ai. Wa Sarabyin (I) gaw, Constantinople mare na Kahtawlik Hkawhkam Theodoric matai n dawk na matu, Arian hpung masha ni a n tsa sharu shatsang ai lam ni n galaw na matu sa hpyi nem ya ai. Sarabyin a hkrun lam a majaw, Sinpraw dan hte sinna dan na Kahtawlik Nawku Hpung lapran rap ra ai akyu hpyi shapraw la lu sai rai nga ai.

Raitmung, Italy Mungdan na Hkawhkam Theodoric gaw, shi a dat kasa SArabyin hte Constantinople mare na Kahtawlik Hkawhkam Justian gaw, Italy Hkawhkam  hpe n kaja ai hku nna gyam wa ai nga, n ten wa ma ai; grau nna Kahtawlika hkawhkam hte Sarabyin a lapran na hku hkau lam ni a majaw, grai n sen wa ai.

Sarabyin Yawhan (I) gaw, Italy Mungdan de, A.D (526) ning hta, bai du wa ai hte Theodoric gaw, shi hpe Tevenna htawng kaw rim sharawng kau wu ai. Sarabyin Yawhan (I) gaw, dai zawn rim rawng hkrum ai nhtoi kade nna yang, machyi makaw hkrum nna htawng kaw nan, Madu hta yup pyaw ban san mat wa sai rai nga ai.

Shi n nga mat ai hpang, Nawku hpung gaw, shi hpe San Pra ai Masha dang dat let, shi a Poi Nhtoi hpe mung, May (18) ya shani masat shagrau dat ya sai rai nga ai. 

By;

Sister Rose Angeline Maran Nang Doi (SFX)

RVA-Kachin Service (Myitkyina)