San Pra ai Sarabyin Sylvester (I) a Poi Nhtoi (December 31)

San Pra ai Sarabyin Sylvester (I) gaw, lai wa sai A.D 314 ning, January shata (31) ya shani hta Sarabyin aya dang da hkrum nna, Kasa Petru a ting-nyang hpe shaning (20) ning jan lit la gun hpai lai wa sai rai nga ai.

Shi gaw, Roma mare daidaw ai rai nga ai. Diocletian mung gyi wa, Nawku Hpung hpe zingri shamyit ai aten garai n du yang, San Pra ai Sarabyin Marcellinus lata hta Jau tai Scramentu hpe hkam la lai wa sai. Shi gaw, Diocletian munggyi wa Nawku Hpung hpe laja lana zingri shamyit ai lam ni hpe ta tut mu lu ai sha n-ga, hkawhkam Constantine a aten hta Nawku Hpung lu la ai awng padang ninglaw hpe mung myi chyaw mu kau da wu ai. Constantine Hkawmhkam gaw, Nawku Hpung hpe tai hpyen a zingri shamyit ai kaw na tsepkawp hkyen la lu sai sha n-ga, San Petru Nawku Htingnu hte Lateran shara kaw na San Yawhan Nawku Htingnu (Basilicas) ni hpe hpyen ni a jahten sharun ai kaw na makawp maga da ya lai wa sai.

San Pra ai Wa Sarabyin Sylvester (I) a aten rai nga ai, A.D 325 ning hta Nawku Hpung galaw ai ahkyak kaba Nicaea Zuphpawng (Shing n rai) Council of Nicaea gaw, grai mying kaba ai rai nga ai. Dai Zuphpawng kaw nna Arius a shut kaba sharin shaga lam rai nga ai, Arianism masa hpe, ndang galang kau ya lu sai. “Madu Yesu gaw, Karai Kasang n re.” nga nna Arius a sharin shaga ai gaw shut kaba rai nga ai. Nicaea Zuphpawng gaw, ndai shut dik ai sharin shaga lam hpe asan sha shadan shaleng ya nna mahtai shapraw jaw ya sai rai nga ai.

San Pra ai Sarabyin Sylvester gaw, Salarian Way ngu mying ai shara kaw na Pricilla a lupwa, (Cemetery of Priscilla) kaw mung, Nawku Jawng langai mi gap ya sai.

Ndai zawn, Sarabyin Sylvester (I) gaw, Nawku Hpung a magam hpe gun hpai shakut nga ai aten, A.D 335 ning, December shata (31) ya shani hta Madu kaw yup pyaw ban sa mat wa sai rai nga ai. Shi a Moimang hpe, shi gaw gap da ai, Pricilla Lupwa na, Nawku Jawng kaw sha makoi mayang da sai rai nga ai.

Nawku hpung gaw, Sarabyin Sylvester n nga mat ai hpang, shi hpe San Pra ai masha masat dang da nna, shi a Poi Nhtoi hpe, shi n nga mat ai shani, December shata (31) ya shani galaw ya ai gaw, daini du hkra rai nga ai.

San Pra ai Wa Sarabyin Sylvester a labau kadun hpe hti hkaja la nna, anhte mung, jaw ang ai magam lam ni hta n hkrit n tsang tsun gwi, shaga gwi ai atsam jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)