San Pra ai Sarabyin Hilary a Poi Nhtoi (February 28) 28 February 2023

San Pra ai Sarabyin Hilary a Poi Nhtoi (February 28)

          San Pra ai Hilary gaw, Italy Mungdan, Sardinia Mare kaw shangai chyinghkai wa ai rai nga ai. A.D (499) ning hta Ephesu Mare kaw galaw lai wa ai, Robber Council Zuphpawng Kaba hta Sarabyin a malai woi awn ya lai wa sai.

Wa Sarabyin a ningtau lit hkam sha naw rai nga ai aten hta Monophysitism “Karai Langai, Marai Langai” nga ai shut shai dik ai sharin shaga lam hpe madi shadaw nna sharin ya ai Hpung htak Saradaw Dioscorus hpe ja ja ning hkap lai wa lu sai. Dai shut shai ai tara sharin ya ai Dioscorus gaw, Deacon Hilary hte kaga Sarabyin ni a Dat kasa ni hpe n gup aga hte sha n-ga lata hte mung shut kau nu ai.

San Pra ai Hilary gaw, Nawku Hpung a Ningbaw, Sarabyin n tai shi yang, Wa Sarabyin Leo the Great a ningtau Deacon lit shatsam hkrum sai rai nga ai. Shi hpe Sarabyin grai nan kam hpa wu ai. Sarabyin Leo the Great Madu hta yup pyaw wa ai hpang, A.D (461) ning, November shata (19) ya shani hta Hilary gaw Sarabyin shatai ya hkrum sai.

San Pra ai Hilary Sarabyin aya dang da hkrum ai hpang, Nawku Hpung hpe grai htap htuk ai hku nna woi awn hkawmsa ai ningbaw tai ya sai sha n-ga, Saradaw ni a ahkaw ahkang ni hpe makawp maga hkye mawai la ya sai. Roma mare Nawku Jawng ni, Hpung hte seng ai zuphpawng ni woi awn galaw ya lai wa nu ai.

Sarabyin a sharin shaga laika rai nga ai “Encylicals” ni hte nan Nicea, Ephesu hte Kasidron (Chalcedron) Zuphpawng ni kaw na sharin shaga ai lam ni yawng hte seng nna, Sinpraw dan Nawku Hpung “Eastern Church” hpe asan sha lu sharin shaga ya lu wu ai. Wenyi hte seng ai lam a ningbaw gaw, hkawhkam n rai, Sarabyin she ningbaw tai, Sara tai ai wa re nga nna ja ja nan sharin ya lai wa sai. Shut shai ai sharin shaga lam hpe n gun jaw ai hkawhkam Anthemus hpe Roma mare de shaga la nhtawm, San Petru Nawku Htingnu kata e nan hkawhkam hpe shi a shut ai myit jasat ni hpe shadum ya ai hte shading sharai la na matu lam matsun ya lai wa sai.

Ndai zawn rai, Sarabyin Hilary gaw, Sasana magam gun hpai nga yang, A.D (468) ning hta February shata (28) ya shani, Madu hta yup pyaw wa sai rai nga ai.

Sarabyin Hilary n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe Mung, February shata (28) ya shani ngu masat shagrau dat sai rai nga ai. Raitimung, February shata (29) ya rawng ai shaning wa ang jang gaw, dai (29) ya shani hta galaw ya ai re lam, labau hta ka matsing da nga ai.

Daini Nawku hpung gaw, San Pra ai Sarabyin Hilary a Poi Nhtoi hpe galaw nga ga ai aten hta, anhte a Hkristan sak prat hkrun lam hta mung, makam masham lam hte seng nna, jaw teng ai lam ni hpe nawku hpung masha shada da tsun shadum jahprang hkat lu na atsam hpe jaw ya rit ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)