San Pra ai Rosalia a Poi Nhtoi (September 4) 04 September 2022

San Pra ai Rosalia a Poi Nhtoi (September 4)

San Pra ai Rosalia gaw, Italy Mungdan, Palermo mare kaw, 1130 ning hta dai daw ai rai nga ai. Shi a kawa gaw, Charlemagne hkawhkam kaba, Sinnibald, Lord of Roses hte Quisquina ni a shu mashi shu masha langai mung rai nga ai. Shi gaw, kaji ai ten kaw nna, Karai Kasang kaw shi a hkum ap ya kau ai; lungpu hku langai mi kaw tinang a myit ra hpe nyet kau n htawm tara shadik let nga ai; aten tup shi hkum hpe Karai Kasang kaw ap da ai.

Dai hpang Mount Pellegrino shara de htawt nna, tara shadik ai, akyu hpyi shaja ai, n dan  ndawng ai shara nga ai; jam jau hkam sharang ai; “Madu Yesu a nni nkri yubak hkam ai lam, matsan masha ni a matsan mayan sak hkrung prat hte mungkan ting na kabai da hkrum ai hpu nau ni hkam sha ai yawn hkyen lam ni hpe” aten tup shi myit sumru let dai ni a matu akyu hpyi ya ai hte bungli galaw shaja ai lam ni galaw lai wa ai.

San Pra ai Rosalia hkawn ji gaw, 1166 ning hta kadai mung n chye kau dat ai, nsa hti mat ai. Shi hpe gaw, shaning tsa ban na ai hpang, San Pra ai Masha ngu masat shagrin shagrau ya ma ai. Shi a dai moi mang hpe, Wa Sarabyin Urban (8) aten hta she mu lu ma ai, shi a labau hta ka matsing da nga ai.  

San Pra ai Rosalia hkawnsek a labau gaw, masha kaga a wenyi lam hta tang du hkra, anhte galaw ya lu ai lam hpe shadum ya nga ai. Shi a sak hkrung aten ladaw ting hta Karai Kasang hta manoi manat let akyu hpyi shaja ai, jam jau jam hkau hkam let, hkam sharang nna nga lai wa sai rai nga ai.  

Daini, Nawku Hpung gaw, San Pra ai Rosalia a Poi Nhtoi hpe galaw nga ga ai aten, anhte a myit masin hta mung, kaga masha ni a matu, myit dum akyu hpyi ya chye ai ni, byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)