San Pra Ai Rosa A Labau Lam ( 26 Nov, 2019 )

San Pra Ai Rosa ( St. Rose )

          Nu wa hpu nau ni, anhte Myanmar mungdan na Nawku hpung masha ni gaw, Rosa ngu shaga lang ma ai. Kaja wa nga jang, ndai Rosa gaw, Rose ngu ai kawn byin wa ai lam rai nga ai. Mai gan Mungdan de gaw, Rose ngu nna tsun shaga lang ma ai. Dai majaw, San Pra ai Rose hte Rosa gaw langai sha re hpe chye na da mai nga ai. San Pra ai Rosa gaw, America Mundan Dingda maga na Peru mung Lima mare kaw shangai wa sai lam chye lu ai. Rosa naw kaji nga ai ten, Numri pan zawn rai grai tsawm ai re majaw, shi hpe Rose (Numri Pan) ngu nna, shamying ya ma ai lam labau hta hpaw tsun da ai hpe chye lu ai. Dai kawn nna, Rosa hpe Rose ngu tsun shaga masai rai nga ai. Nawku hpung a labau hta grai tsawm htap ai Shayi sha ngu, shagrau hkrum ai jan mung rai nga ai. Naw Kaji ai ten kawn tsawm ai re majaw, asak ram wa ai hte, ahpraw nsam grai tsawm wa ai da. Raitim, Rosa gaw, grai reng ai lam n nga, gumrawng gumtawng ai myit mung nrawng ai, ya na zawn shi a tsawm htap lam a majaw, masha ni hpe mung agung alau nbyin u ga matu, shi a kara hpe zen kau nhtawm me, shi a myiman hta mung majap ni chya rai, jahten kau ai lam chye lu ai. Daizawn jahten kau timung, Rosa a hpraw nsam gaw tsawm nga ding yang rai nga ai. Rosa gaw, shi a tsawm htap ai hpraw nsam hte shi a prat hpe Madu Yesu kaw ap nawng daw jau nga nu ai.

          Bai nna, laban bat mi hta, masum lang lu sha gam akyu hpyi nga nu ai. Bai, shat mung n sha, muk hte ntsin sha, lu sha  nga ai lam San Pra ai Rosa a labau hta matsing da nga mali ai re. Dai aten hta, Kanu yen Kawa grai matsan mat ai re majaw, Rosa gaw masha ni a nta kaw nchyang num tai nna, nga nga ra nu ai.  Shani a ten hta gaw, sun de amu bungli galaw nhtawm me, shana rai jang gaw, arai chywi ai hte kanu kawa ni hpe bau garum ya nga ai jan mung rai nga ai. Rosa gaw shi sa galaw ya ai nta na sun wang hta, ginsum kaji langai mi galaw gap la nna, Mama zawn dai ginsum nta kaw nga nna, lu sha gam, akyu hpyi shaja nga nu ai. Bai nna, yup ku a malai, wut tawng ni hpe a dup grawp la nna, dai wut chyen ni hpe nep da ai ntsa kaw yup ai rai nga ai. Rosa a baw hta gumhpraw janmau gup ai hpe shi a hkrang sumla ni hkan anhte mu ga na re. Dai gumhpraw janmau kata hta hpri hte hkri ai ju sumri rawng ai lam chye lu ai.  Shi a nshang kaw mung ju rawng ai hpri sumri shing kyit kyit da nga ai. Ndai hpri ni gade machyi ai raitim, Rosa gaw shut hpyit mara lu ai ni myit malai lu na matu, shi a hkum hpe yubak hkam la nga ai rai nga ai.

          Nu wa ni, San Pra ai Rosa gaw, ya na zawn, shut hpyit mara lu ai ni yawng a matu, shani shagu akyu hpyi ya nga nu ai. Rosa naw kaji nga ai ten grai lu su sahti ai raiitm, nmyit mada ai sha, grai yak hkak jam jau ai dum nta masha ni tai mat wa ai. Raitim, Rosa gaw, ndai matsan jam jau ai hpe hpa zawn nnawn ai sha, mai byin ai maga hku nna, dum nta masha ni hpe lu na sha na, tam jaw nga ai jan mung rai nga ai. Dik shale masha ni kaw nga nna, nchyang bungli kawn hkawn galaw let, dum nta masha ni myit nkaji hkra bau maka lai wa sai rai nga ai. Mau hpa langai gaw, dai ram yak yak hkak hkak jam jau ai raitim, myit kaji ai lam n nga, masha ni kaw n chyang chyang nna, nta masha ni a matu sha n ga, shut hpyit mara kap ai ni yawng a matu shakut nga ai lam rai nga ai. Nu wa ni, hpri hku gup gup, hpri shing kyit kyit nna, maring marawng re ai wut chyen kaw yup na ngu ai gaw loi ai lam n rai nga ai. Dai ram ram tsawm ai jan, ndai zawn galaw ai, ngu ai gaw, mau nma, shakawn nma hpa rai nga ai. Dai gaw shi a san seng ai myit masin hte ap nawng shakut shaja ai myit a majaw, Karai Kasang a lak san shaman chyeju hkam la lu ai lam rai nga ai. Ga shadawn anhte nang ngai marai langai ngai, Rosa zawn rai, Num ri pan zawn tsawm htap ai wa re ngu ga, shi zawn ap nawng lu na kun? Myit yu ga.

          Nu wa ni, ya daini na mungkan hta tsawm shingjawng taw ai ni law law rai nga ai. Ntsawm ai hpe pi tsawm hkra ja gumhpraw law law ma hkam nna, gram nga ma ai hpe mu lu nga ga ai re. Rosa zawn Madu Karai Kasang a matu, ap nawng mayu ai ni nau wa n nga na shadu ai. Tinang tsawm htap ai hpe hpaga langai hku shatai nna, sak hkrung nga ai ni mung law law rai nga shadu ai. Hpa mi rai rai, San Pra ai Rosa a prat hpe myit dum let, tinang a tsawm htap ai prat hpe manu shadan na nmai malap ai. Karai Kasang jaw ai tsawm htap maka hpe Shi  Madu kaw ap nawng ya na mung n lahpawt ga, ngu n gun jaw mayu n ngai. Shingrai, San Pra ai Rosa a ap nawng akyu hpyi htinglu htinglai ai a marang e, Peru mungdan hta shut hpyit mara lu ai masha ni law law myit malai wa nna, dinghpring mai kaja ai masha ni law wa sai lam, labau hta adan sha mu lu nga mali ai nu wa ni. San Pra ai Rosa gaw, asak hte nbung hkra bungli galaw shakut ai re majaw, shi a asak (31) ning hta Madu woi la hkrum sai rai nga ai. Rosa a moi mang hpe Saradaw hte Nawku hpung masha ni, tsawm htap  ai hku makoi mayang sai lam labau hta matsing da nga mali ai re. San Pra ai Rosa a poi nhtoi hpe Nawku hpung kawn nna, August shata (23) ya shani ngu masat da ya sai rai nga ai. Shingrai, tsawra ai nu wa hpu nau ni, San Pra ai Rosa a kasi hpe la let, gumrawng gumtawng ai myit, reng ai myit masin ni hpe koi yen kau nhtawm me, yawng a matu sak hkrung chye ai ni byin tai wa lu hkra shakut ga ngu, n gun jaw let, lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.